美軍海外執勤3個月！信錯保姆託管11歲愛犬 返家驚見人去樓空結局超心碎

信錯保姆突失聯閉路電視揭驚人一幕連人帶車偷走

事主安德魯係一名美國空軍，因為要被派駐海外，於是透過寵物保姆網站，委託一名叫詹森嘅保姆照顧11歲哈士奇Maverick。起初保姆都好盡責，定時傳相報告狗狗狀況，點知一個月後就突然人間蒸發，完全失聯！心感不妙嘅安德魯即刻翻查家中閉路電視，結果見到極度崩潰嘅一幕：保姆詹森竟然抱住佢嘅愛犬，然後開走埋佢架車，從此失去蹤影！安德魯心急如焚，喺4月3日即刻上網發文求救：「佢（詹森）仲未搵到，我隻狗俾佢偷走咗！」

全城狗主震怒洗版尋狗軍方特准提早回國救毛孩

事件曝光後，大批網民替事主不值，全城狗主更是震怒，紛紛洗版鬧爆無良保姆，並幫手轉發尋狗消息，事件更引起當地各大媒體關注。安德魯嘅心碎帖文驚動埋軍方，軍方亦體恤其情況，特別批准佢提早結束海外執勤，等佢可以返屋企專心搵返「毛孩」。正當全城集氣希望可以搵返Maverick之際，警方經過長達一個月嘅調查後，卻傳來一個最壞嘅消息。

苦尋1個月驚傳噩耗愛犬慘死失竊車內狗主崩潰

直到5月2日，警方終於喺丹佛搵返安德魯被偷走嘅座駕，但同時喺車上發現一個令人心碎嘅事實——愛犬Maverick嘅遺體。苦苦守候一個月，等來嘅卻是天人永隔嘅噩耗。安德魯悲痛欲絕，喺網上證實死訊：「我懷著沉痛嘅心情話俾大家知，Maverick被發現困喺車上，已經過身了。」目前，當地警方仍在全力追緝在逃保姆詹森嘅下落，並呼籲民眾提供線索，希望能盡快將呢位無良保姆繩之於法。