死神來真人版！四川男低頭玩手機巨型貨車竟從天而降僅差一步…

平時出街做「低頭族」掛住玩手機，好多時都會被話危險，但有無諗過呢個壞習慣，竟然會喺生死關頭救你一命？近日四川就發生一宗恐怖意外，一名男子喺街頭步行時，一架大貨車竟然從天而降，直插佢面前，距離僅僅一步之遙，驚險過程全被CCTV錄低，畫面震撼全網！

天降橫禍！大貨車直插地面僅差一步事主嚇到呆企原地

從網上瘋傳的影片可見，事發時一名頭戴安全帽的男子正沿著輔路慢行，全程低頭專心睇手機，對周圍環境毫無察覺。電光火石之間，一架大貨車突然從上方道路衝破護欄，成架車垂直墜落！巨響傳來，事主先被嚇到抬頭，隨即有白色護欄碎片跌落，佢本能地伸手一擋。當佢意識到一架貨車就喺自己面前時，當場嚇到愣在原地幾秒，完全反應唔切。幸好事主因為玩手機而步速較慢，就係呢「慢一步」，令佢同死神擦身而過！

影片瘋傳網民群組洗版激辯低頭族習慣係救命符定催命符

事件曝光後，驚險片段即時喺各大群組洗版，大批網民替事主捏一把冷汗，紛紛驚呼「老天保佑！」、「真係命大！」。有網民就錯重點，笑言「這下知道滑手機也能救命？」、「慢得剛剛好，再快一步就直接掰了。」不過，亦有理性網民即時反駁，認為事件純屬好彩，點出關鍵：「這不是滑手機好嗎，是他運氣好！」、「純粹命大，千萬別學」，認為將「玩手機」當成救命符實在太危險，今次只係萬中無一嘅巧合。