港產橘貓咬人失敗！嬲到塊面變形畫面曝光網民爆笑：呢隻肯定係大佬

養貓嘅樂趣，好多時都係嚟自同主子之間嘅互動，但有時主子嘅倔強脾氣，真係會令人哭笑不得！最近網上就瘋傳一段影片，一隻橘貓因為一個超無聊嘅堅持，竟然嬲到塊面都變晒形，成個過程俾主人完整拍低，引發超過18萬網民圍觀，大讚係「相愛相殺」嘅最高境界！

貓奴神之防守激發主子鬥志嬲到塊面徹底扭曲

事源係片中嘅橘貓主子唔知咩事，突然狩獵魂大爆發，死盯住主人隻手，擺出一個「我今日一定要咬到你」嘅兇狠姿態。正當佢猛然撲上準備「行兇」之際，貓奴眼明手快，即刻拎出一個黃色毛球公仔做「盾牌」擋駕。點知呢個防守動作，非但無令主子退縮，反而徹底激發咗佢嘅鬥志！攻擊被擋嘅橘貓當場「惱羞成怒」，嬲到即刻豎起飛機耳，成塊面嘅五官都因為憤怒而扭曲，表情極度猙獰，誓要突破防線！

影片瘋傳吸18萬人圍觀網民笑指係相愛相殺

事件曝光後，影片喺社交平台被瘋狂洗版，至今已累積超過18萬次觀看，大批網民睇到笑爆，紛紛留言替貓奴「贈興」：「呢個表情真係嬲到塊面都變形」、「十隻橘貓九隻賤，呢隻絕對係領頭嗰隻」、「好明顯就係想玩，貓貓根本無諗過要傷害人」、「呢種賤賤地嘅先好玩，樂趣多啊！」更有網民精闢總結，話呢種行為完美演繹咗「相愛相殺嘅最高境界」，睇嚟大家都好享受呢種貓奴同主子之間嘅鬥法。