湊仔湊到懷疑人生，仲要擔心家庭開支？美國一位30歲全職靚媽，自從誕下第二胎後，家庭經濟壓力大增，丈夫一份人工根本唔夠撐起成頭家。正當山窮水盡之際，佢竟然諗到一條絕世好橋，利用每日仔女瞓覺嘅「零碎時間」，喺屋企密密做，每周最高狂賺$11,800港元，令唔少媽媽級網友大呼神奇！

靚媽呻窮誕二胎後收入大插水

呢位住喺美國猶他州嘅30歲全職媽媽Lindsy Jolley，去年生完第二個BB後，經濟壓力即時爆煲。佢自己本身經營嘅寵物日托生意收入下滑，而老公從事牙科工作嘅薪水，亦難以應付一家四口嘅日常開支。由於Lindsy唔想離開小朋友出去打工，更加計劃將來要在家教育仔女，於是決心要搵出一條時間彈性、唔使返Office嘅賺錢新血路。佢開始透過社交平台鑽研各種網上副業，並利用仔女午睡或夜晚瞓著後嘅黃金時間工作，結果成功開拓多個收入來源，每周穩定賺取約$3,900至$11,800港元！

拆解每周勁賺$11800三大秘技

事件曝光後，唔少網民都對佢嘅賺錢方法極感興趣，Lindsy亦大方分享自己嘅三大收入來源！佢透露，目前最穩定嘅收入係「市場調查焦點小組」，每日只需花30分鐘填寫篩選問卷，就有機會參加網上訪談或產品測試，每次報酬高達$390至$1570港元，有時單靠呢項收入一星期已超過$7,800港元！其次，佢亦有參與「亞馬遜影響者計劃」，透過拍片評測產品賺取分潤，不過佢坦言競爭大，收入較為浮動。最後一項就係經營TikTok同Instagram，靠推薦連結同內容行銷賺錢，如果影片爆紅，單周收入更可超過$6,200港元，但同樣要視乎平台流量，收入唔算穩定。

事主坦言時間管理係最大挑戰

雖然搵到錢，但Lindsy都大呻要喺湊仔同工作之間取得平衡，絕對唔係易事！佢坦言最大挑戰就係時間管理，如果喺小朋友醒住嘅時候開工，唔單止效率低，仲好容易引起家庭磨擦，所以佢堅持將工作集中喺仔女瞓覺嘅時間。佢亦以過來人身份建議，想發展副業嘅人唔應該一開始就「瓣瓣掂」，而係要先專注掌握一項技能，再慢慢擴展。佢強調，副業雖然可以幫補家計，但未必能夠即時取代正職，需要疊加多種收入來源，先可以達到穩定嘅效果。