日本玩具巨頭Bandai旗下嘅化妝品牌CreerBeaute，一向都好識得捉住一眾粉絲心理，推出唔少動漫角色聯名嘅美妝產品。最近，品牌就宣佈會為兩大女性向超人氣作品《IDOLiSH7-偶像星願-》同《刀劍亂舞》推出全新系列彩妝粉，定價770日圓（約港幣$39），包裝仲設計成演唱會門票咁，極具收藏價值！消息一出，本應係普天同慶，點知官方一個銷售決定，即刻引爆粉絲集體怒火！

官方原堅持盲盒玩法粉絲鬧爆食水深

原來，Bandai最初宣佈呢兩款分別有16款同10款角色嘅彩妝粉，將會以「盲盒」形式隨機發售！呢個玩法即係話，粉絲想買到自己「本命」角色，隨時要買完再買，分分鐘荷包大出血都未必抽得中，完全係將粉絲當「水魚」咁劏！呢種「Gacha」抽獎玩法雖然喺日本好常見，但今次就辣著咗大批粉絲，怒斥官方食水深，根本係變相強迫消費，完全唔理粉絲感受！

事件曝光後網民群起公審官方極速跪低

事件曝光後，大批網民喺社交平台群起公審，鬧爆Bandai嘅銷售手法！可能係見群情洶湧，加上早前日本一個調查顯示，有超過85%嘅女性受訪者表明極度討厭呢種隨機抽獎嘅商品，擔心會影響粉絲對作品嘅熱情。面對排山倒海嘅負評，Bandai內部經過討論後，竟然喺4月30日火速跪低，態度180度大轉變，宣佈推翻原定嘅盲盒銷售計劃！

官方罕有跪低宣佈取消盲盒兼唔加價

Bandai官方正式發出公告，為咗令粉絲可以買到心儀嘅款式，決定取消盲盒玩法，改為可以直接揀款購買！最令粉絲驚喜嘅係，即使改咗玩法，官方都承諾產品唔會加價，維持原價770日圓發售，簡直係良心發現！雖然因為要重新設計包裝，產品需要延期到8月同9月先推出，但粉絲們都表示絕對值得等！對於已經預訂咗「原盒套裝」嘅粉絲，官方就建議直接聯絡返銷售店舖查詢訂單安排。今次官方從善如流嘅做法，獲網民一致讚好，大讚係消費者嘅一大勝利！