日本黃金周慘況！調查揭驚人真相 逾4成人零活動 全因一個慘痛現實

驚揭逾4成人零活動！平均預算僅$1400日圓大跌成致命傷

根據日本市場研究公司Intage對5,000人進行嘅年度調查，結果令人震驚。當被問到黃金周有咩計劃時，高達41.2%受訪者直言「無任何計劃」，另外有35.1%人表明會「留喺屋企」。荷包乾硬化係主因，今年黃金周嘅人均預算暴跌至27,660日圓（約$1400港元），比去年大減5.4%。有近半（49.2%）受訪者大呻，物價飛漲加上日圓匯率插水，根本無錢消費，唯有勒緊褲頭。

外國遊客湧入變相搶貴！日人慘呻連國內旅行都玩唔起

事件曝光後，唔少日本民眾都大感無奈。出國旅行更加係天方夜譚，調查顯示只有1%人有此計劃。但最慘嘅係，連留喺國內旅行都變得奢侈！因為日圓疲弱，吸引大批外國遊客湧入日本，酒店同旅遊景點見狀即時加價，目標直指海外豪客。呢個情況令本地日本人陷入兩難，一方面出國太貴，另一方面國內消費又被遊客搶高，硬食「遊客價」，令唔少人大呻連自己國家都玩唔起，情願留喺屋企算數。

昔日純玩樂長假不再！黃金周淪為憂鬱週全民叫苦連天

總結整個調查，計劃國內旅行嘅日本人只得12.3%，情況相當慘淡。昔日黃金周係日本人唯一可以撇甩家庭責任、純粹玩樂嘅長假，如今卻因為經濟壓力，變成一個充滿憂慮嘅「靜態假期」。面對飛漲嘅物價同被遊客推高嘅內需消費，唔少日本人慨嘆，連放假嘅小確幸都保唔住，黃金周嘅歡樂氣氛已不復再。