Pokémon卡（寵物小精靈卡）近年有價有市，每次推出新款或補貨，都引來大批「黃牛黨」掃貨再放上網炒賣，普通玩家同小朋友想用正價買到心頭好，簡直難過登天！不過，最近日本有間舖頭就決定不再坐視不理，推出超狂奇招反擊，要班黃牛黨知難而退，被網民大讚是「良心商店」！

東京電器店出4大絕招！買卡要先考小精靈隨堂測驗

事發在東京池袋的Bic Camera西口分店，最近因為人氣卡牌「忍者旋風 Mega擴充包」再度返貨，店舖為咗杜絕黃牛黨大手購入，竟然諗出4大絕招！第一關，竟然係要先通過「小精靈知識問答大會」！店內貼出告示，表明客人需要正確回答職員隨機抽問的十幾隻小精靈名，答錯就即時被DQ，無得買！此舉旨在篩走班只睇炒價、唔熟識小精靈的黃牛。此外，客人亦必須出示Bic Camera的會員卡或手機App，方便店員追查購買記錄，防止同一人短時間內大量掃貨。每人亦限購一盒（內含30包），嚴禁以轉售為目的購買。

事件曝光網民激讚良心店！大嘆炒價離譜終有舖頭肯出手

呢個「買卡要考試」嘅奇招一出，隨即在網上引發熱議，群組被瘋狂洗版！大批真正玩家及粉絲都留言激讚店舖做法，認為是真正保護粉絲的「良心之舉」。不少人長年大呻，熱門卡牌一出市面即被黃牛掃清，網上炒價動輒貴幾倍甚至十幾倍，根本「當客係水魚」，令真心想玩嘅人完全買唔到。今次Bic Camera肯花心思設計關卡，雖然麻煩，但總算係踏出重要一步，對抗炒賣歪風，令粉絲大為感動。

終極絕招拆走包裝膠膜！黃牛黨即時「斷臂」無得再炒

如果以為答啱問題就過關，少年你太年輕了！Bic Camera的終極絕殺招數，是在客人付款後，店員會即場將卡盒的「收縮膠膜」及外盒穿孔部分全部拆走！呢一招可謂極度致命，因為收藏品市場極度重視「全新未開封」狀態，一旦拆走膠膜，卡盒的轉售價值即時插水式下跌。黃牛黨買入呢啲「已開封」的貨品，根本無可能再以高價轉售圖利，等同即時「斷臂」，令佢哋無肉食之下只能放棄，確保卡牌可以留俾真正嘅玩家！