Sanrio樂園出事？Hello Kitty收工後變人間煉獄玩家被困索價¥7480逃生

講起Sanrio Puroland，大家第一時間都會諗起Hello Kitty、My Melody等可愛角色，絕對係少女心爆發嘅夢幻國度。但你又有無諗過，當樂園關門、一眾可愛角色「收工」之後，呢個童話世界會變成點？今年6月，Sanrio樂園將會喺晚間時段大變身，推出一個極度暗黑嘅恐怖體驗，可愛形象徹底崩壞，想去日本玩嘅朋友要留意喇！

## 可愛樂園晚間突變煉獄玩家被困挑戰7大死亡遊戲

今次Sanrio破天荒同東京著名鬼屋設計公司Obaken合作，推出名為「Obaken Psycho Game」嘅限定活動。故事設定超心寒，一個名為「Psykers」嘅犯罪組織將會佔領樂園，封鎖所有出口，所有在場人士將會被逼參加佢哋設計嘅7個「遊戲」。玩家需要喺樂園唔同區域完成挑戰嚟儲分，先有機會「獲釋」。更恐怖嘅係，班「Psykers」成員會喺樂園內四處遊蕩，隨時突襲伏擊玩家，如果遊戲玩得差，仲要接受「恐怖懲罰遊戲」，主題更由以往嘅鬼怪轉為「人類嘅瘋狂」，挑戰你嘅心理極限！

## 主辦方明言非溫和派驚嚇中學生以下禁止入場挑戰膽量

唔好以為有Sanrio個名就係老少咸宜！主辦方Obaken已經講明，今次活動絕非「溫柔輕量級」嘅驚嚇體驗，為免嚇親小朋友，活動開始前會先清走日間嘅普通遊客，而且嚴格規定中學生以下嘅兒童禁止入場。從官方釋出嘅預告片可見，氣氛極度詭異，充滿令人不安嘅畫面，擺明車馬係為追求極致官能刺激嘅大人而設，膽小者絕對要三思！