講起經典遊戲《Final Fantasy VII》嘅最強反派，大家一定會諗起型到跌渣嘅「片翼天使」薩菲羅斯（Sephiroth）。佢由萬人景仰嘅英雄，黑化成一心要毀滅星球嘅大奸角，形象深入民心。不過，最近有日本網民發現，呢位曾經叱咤風雲嘅最強士兵，竟然「轉行」撈過界，最新動向令全球粉絲睇到O晒嘴，估唔到佢唔再搞破壞，反而走去做咗呢件事！

最強士兵淪落賣酒廣告內容極衝擊

原來薩菲羅斯最近竟然「為五斗米折腰」，幫日本飲品巨頭Asahi代言一款名為「Future Lemon」嘅罐裝雞尾酒！喺最新曝光嘅廣告片入面，薩菲羅斯一改以往陰沉冷酷嘅形象，唔再效力神羅公司嘅佢，似乎都要搵食。片中佢拎住招牌長刀「正宗」，唔係用嚟打交，而係用嚟……切檸檬！鏡頭一轉，佢已經拎住罐裝酒，仲配上內心獨白：「切開檸檬。這是真材實料。不只是喝。好開心。」，最後仲露出一個滿足嘅表情，反差之大令網民極度震撼，大呻男神形象徹底崩壞！

網民洗版熱議男神搵到快樂勁安慰

事件曝光後，大批網民替事主不值之餘，亦紛紛湧入官方頻道洗版！唔少粉絲留言話「估唔到薩菲羅斯都有搵到快樂嘅一日」、「睇到佢咁開心我都安慰了」。廣告商亦食住個勢，特登加入薩菲羅斯嘴唇嘅大特寫鏡頭，仲建議大家可以食埋罐入面嘅原塊檸檬片，擺明就係想攻陷一眾粉絲嘅心！廣告最後仲溫馨提示大家要適度飲酒同回收空罐，最強反派突然變得咁貼地，難怪引起網民瘋狂討論。

官方加碼預告現實版酒吧即將開幕

你以為咁就完？少年你太年輕了！今次嘅合作企劃原來仲有後續。官方宣布，為咗配合宣傳，遊戲中另一人氣角色蒂法（Tifa）所經營嘅酒吧「第七天堂（Seventh Heaven）」，將會喺本星期於東京現實世界中正式開幕！消息一出，粉絲們都表示非常期待，更好奇嘅係，到底「轉行」賣酒嘅薩菲羅斯，會唔會親身去老友間酒吧飲返杯，定係鍾意自己一個喺屋企慢慢歎呢？