機迷集體回憶返晒嚟！相信唔少《Final Fantasy》同《勇者鬥惡龍》嘅忠實粉絲，都對2025年春天結業嘅秋葉原Square Enix Cafe感到相當惋惜。呢個曾經係機迷們嘅朝聖地，留低唔少美好回憶。不過各位粉絲唔使再傷心，因為官方最近投下震撼彈，宣布Square Enix Cafe唔單止會喺東京復活，仲會首次衝出日本，喺美國開設首間永久分店，消息一出即刻引爆機迷圈熱議！

FF迷聖地復活！東京新宿店大升級兼殺入美國洛杉磯

根據官方最新公佈，全新嘅東京Square Enix Cafe將會告別秋葉原，轉戰到市中心另一邊嘅熱鬧地段——新宿！新店將會由現時位於新宿站對面嘅Pop Up Cafe擴建升級而成，成為永久性嘅「Officially Licensed Square Enix Cafe & Shop Shinjuku」。而更令海外粉絲興奮嘅係，美國洛杉磯亦會迎嚟史上第一間官方永久分店，選址小東京區（Little Tokyo），並標榜會提供「完整而正宗的菜單」，睇嚟今次Square Enix係決心要將原汁原味嘅體驗帶到太平洋嘅另一邊！

粉絲最擔心呢樣嘢！美日兩店餐牌或有天淵之別

事件曝光後，大批網民雖然興奮，但亦有眼利粉絲發現一個「暗湧」，隨即引起洗版式討論！原來東京新宿店將繼續由日本知名餐飲集團Newton Corporation（Pasela）營運，佢哋嘅食物質素一向有極高保證，好似當年秋葉原店嘅漢堡就令唔少人食過返尋味。但洛杉磯店嘅營運商就係另一間公司「J-Pop Culture Cafe Inc.」，官方暫時未有說明兩地團隊會唔會合作，意味住兩間分店嘅餐牌同食物水準，隨時有天淵之別！唔少粉絲都大呻最擔心去到美國分店會「中伏」，食唔返日本店嘅高質素美食，希望官方可以盡快釐清！

開幕日期有兩個版本？官方周邊商店同步登場必掃限定品

除咗食物質素，另一個有趣嘅地方係開幕日期竟然出現兩個版本。根據英文新聞稿，兩間新店將於2026年春季開幕，但日文新聞稿就寫住係初夏。雖然時間上有少少出入，但好彩都唔使等太耐。無論如何，最令粉絲期待嘅，莫過於兩間Cafe都會附設官方商品店！參考以往經驗，就算唔入去食嘢，都可以入店內盡情選購心水周邊商品，各位FF同DQ迷係時候儲定彈藥，準備到時去掃貨喇！