大學學位是否成功嘅唯一入場券？當不少同齡人仲為升學選科而煩惱，美國一位18歲青年就毅然放棄升讀大學嘅機會，選擇一條截然不同嘅路，結果年薪竟然高達近47萬港元，更預計5年後人工直接翻倍，究竟係做邊行咁好搵？

唔想揹一身學債決定另覓出路

綜合外媒報導，呢位名叫Chris Rocha嘅18歲美國青年，因為媽媽開設建築公司，加上爺爺都係水喉技工，令佢自細就對相關行業有一定認識。喺高中三年級時，佢眼見升讀大學將會面臨沉重嘅學生貸款壓力，毅然決定放棄升學，選擇一條可以「邊學邊賺」、職涯路徑更清晰嘅道路——投身水喉技工學徒計劃。佢喺年滿18歲後就馬上申請工會學徒計劃，喺每年多達800人嘅競爭中脫穎而出，正式展開為期5年嘅系統式訓練。

事主親解心聲坦言更重視經濟穩定

Chris表示，雖然學徒嘅生活絕對唔輕鬆，每星期要工作約40小時，放工後每星期仲要上兩晚理論堂，內容涵蓋數學、科學同技術應用，工時長之餘對體力要求亦相當高，但佢認為呢份工實務性強，需要即場解決問題嘅能力，面對人工智能（AI）嘅衝擊，反而比唔少白領職業更具不可替代性。佢坦言，雖然有時都會嚮往大學多姿多彩嘅社交生活，但相比起要背負巨額學債，佢更重視提早就業所帶嚟嘅經濟穩定，所以對當初嘅決定從未後悔。

學徒起薪點年薪47萬5年後有望翻倍

最令人驚訝嘅係佢嘅收入！Chris作為學徒，起薪點已經高達每小時28.76美元（約225港元），年收入接近6萬美元（約47萬港元），遠超唔少大學畢業生。根據工會制度，學徒薪酬會逐年遞增，當佢5年後完成訓練、晉升為正式技工時，年薪更有望突破11.5萬美元（約90萬港元），實現人工翻倍！喺唔少同齡人仲為學費同前路徬徨之際，佢已經穩打穩紮，逐步建立自己嘅經濟基礎，提早實現財務自由。