吉卜力嘅產品一向都係粉絲荷包嘅「最強敵人」，每次一出新品都引發搶購潮！最近，官方又推出全新周邊，定價只係550日圓（約$27港元），超親民嘅價格已經令一眾粉絲蠢蠢欲動。今次嘅新品設計極具巧思，標榜可以「一物兩用」，唔單止實用，仲可以拎上手玩，令唔少人大讚創意十足，已經準備好要入手！

貓巴士無臉男化身公仔襪穿上腳超可愛

原來今次嘅新品就係「公仔襪」（Puppet Socks）系列嘅全新款式！襪子本身已經超可愛，最特別嘅係佢哋唔單止可以著上腳，仲可以當成手偶公仔玩，大人細路都啱！今次新加入嘅角色有《龍貓》入面嘅貓巴士，同埋《千與千尋》嘅無臉男。貓巴士款提供三種尺寸，由9cm嘅幼童款（附防滑底）到25cm嘅女裝款都有；而無臉男款就有13-19cm同23-25cm兩種尺寸，只要將手仔放入襪入面，拇指同尾指就可以控制佢對手臂，設計相當過癮！

網民熱議無臉男手偶設計大讚可愛又抵玩

事件曝光後，大批粉絲已經喺網上洗版式討論，個個都大讚設計可愛又有心思！唔少人已經諗定要買邊款，仲話550日圓一對嘅價錢真係「抵到爛」，絕對要包款處理。其中，無臉男嘅手偶設計成為焦點，有網民笑言大人玩就可愛，但如果用嚟氹小朋友，可能會嚇親BB，場面一定好搞笑。無論點，呢個價錢可以買到襪又可以當公仔玩，性價比極高，難怪引發粉絲瘋搶。

龍貓款驚喜加推男裝尺寸情侶裝無難度

正當大家以為焦點只係貓巴士同無臉男之際，官方再投下震撼彈！原來早前已經推出嘅龍貓同吉吉公仔襪系列，今次龍貓款更驚喜加推25-27cm嘅男裝尺寸，換言之，而家可以湊成一套情侶襪或者家庭襪，全家一齊著住龍貓出街，諗起都開心！全系列公仔襪已經喺日本「橡子共和國」門市同網店上架，每對都只係賣550日圓，想入手嘅粉絲真係要快手，預計好快就會被掃清光！