3.2億彩金得主玩失蹤？7-11開出巨獎至今無人認領官方罕有發聲：再唔現身就...

一夜致富係唔少人嘅夢想，但如果幸運之神真係敲門，你又會唔會懵然不知？美國德州最近就發生一單全城熱話嘅奇聞，一張喺7-11便利店買嘅彩票，竟然成功贏得高達3.2億港元嘅巨額頭獎，但最離奇嘅係，呢位神秘嘅幸運兒竟然玩「失蹤」，至今都未現身領獎，搞到官方都要出面尋人！

電腦隨機選號竟全中頭獎獎金高達4100萬美元

事件發生喺美國北德州梅斯基特（Mesquite）一間州際公路旁嘅7-11便利店，一張「Lotto Texas」彩票成功贏得高達4100萬美元（約3.2億港元）嘅巨額頭獎，創下該彩票超過一年以來嘅最高獎金紀錄！據報，呢張中獎彩票嘅號碼係由電腦隨機揀出，號碼分別係21、28、33、34、43及44，竟然就咁全數命中，官方都形容「對中獎者嚟講，係一個難以忘懷嘅夜晚」，點知呢位主角至今都未蒲頭！

官方罕有緊急呼籲中獎者簽名自保尋求專業意見

事件曝光後，大批網民都替呢位「大頭蝦」得主心急，全城熱議到底邊個係幸運兒。眼見巨獎懸空，連德州彩票官方都罕有發出公開呼籲，提醒潛在嘅中獎者，如果確認中獎，第一時間應該先喺彩票背面簽名，然後將佢妥善保管。官方更建議得主唔好心急，應該先尋求專業嘅財務同法律意見，做好準備之後，再聯絡彩票單位安排兌獎，確保可以穩穩陣陣袋走呢筆橫財。