Alton初嘗潛水超興奮 忘我探索海底世界
節目中，Alton同Chris去到旅程最後一站仙本那，潛水新手Alton終於可以一嘗心願，體驗水肺潛水。雖然事前Chris笑佢緊張到發抖，但Alton一落到水就將緊張拋諸腦後，完全被海底世界吸引。佢興奮表示：「從頭到尾都被興奮蓋過緊張，很期待，很想它快點發生！」由睇到啡色珊瑚、綠色小魚，到近距離觀察海星，Alton都覺得大開眼界，形容「每分每秒都很精彩」，更令潛水老手Chris都諗返起自己初次潛水嘅感動。
深入巴瑤族村落被嚇親 小朋友搶零食秒速走佬
潛水過後，二人深入探訪當地原住民族巴瑤族嘅村落，點知眼前景象同想像中完全唔同。村莊環境衞生情況欠佳，海上更漂浮大量垃圾，令佢哋相當震撼。期間有小朋友不停圍住佢哋要求買零食，Alton出於好心買咗畀佢哋，點知小朋友一拿到零食就即刻跑走，連多謝都冇句，令Alton大感失望：「我有種傷心，我覺得我的善良被人利用了。」呢個小插曲似乎為之後嘅不愉快經歷埋下伏線。
仙本那海鮮市場混戰 Alton講價顯功架
為咗同當地巴瑤族人有更直接嘅交流，佢哋決定去海鮮市場買海鮮，再拎去餐廳加工。一去到市場，小販們蜂擁而上，場面極度混亂，叫賣聲此起彼落，Chris形容好似「戰鬥」一樣。喺一片混亂中，Alton竟然成功使出渾身解數，同小販鬥智鬥力講價，最後成功用200令吉（約400港元）買到兩隻手臂咁粗嘅龍蝦，更以20令吉（約40港元）超低價買到海膽，過程刺激又好笑，令佢哋對即將來臨嘅海鮮大餐充滿期待。
海鮮加工店中伏變噩夢 海膽蒸蛋等足兩小時
點知呢餐期待已久嘅晚餐，竟然係一場噩夢嘅開始。佢哋將戰利品拎到附近一間海鮮加工餐廳，結果瀨尿蝦上枱時已經凍晒，龍蝦肉質亦變得又老又韌，完全唔新鮮。最令人崩潰嘅係，佢哋點嘅四隻海膽蒸蛋，竟然等咗接近兩個鐘都未到！Chris多次追問，店員只係不斷推搪話「要過半小時」，令佢哋由期待變失望，再由失望變憤怒，成餐飯氣氛極度尷尬。
Chris梁彥宗罕有發火 怒轟餐廳離譜
等咗接近兩小時，海膽蒸蛋終於上枱，但質素極度強差人意，Chris形容係「雷聲大雨點小」。忍無可忍嘅Chris終於大爆發，身為「大馬女婿」嘅佢都忍唔住用廣東話質問店員：「你哋平時蒸海膽也要過半小時嗎？」、「你當我… 第一天吃！」佢直指餐廳處理手法有問題，就算漏單都唔應該等咁耐。最後Chris更喺鏡頭前公開表示：「我們親身體驗過後，我個人不建議。」睇嚟呢次經歷真係令佢哋極度不滿，大明星都慘變旅遊中伏苦主。
