執屋搵到阿爺遺物，隨時一夜暴富？美國紐約一名男子早前整理祖父遺物時，發現17本殘舊古書，以為執到寶，即刻拎去變現，點知書商一睇，竟意外揭發一宗塵封40年、涉及紐約傳奇富豪家族嘅驚天竊案！呢批古書估值近300萬美元（約2,500萬港元），事件震驚全城！

塵封40年驚天竊案曝光全因一個舉動

事發於今年1月，該名男子將17本古書帶到曼哈頓兩間書商求售。書商接過手後，按程序喺藝術品失竊登記系統查核，赫然發現呢批古書竟然榜上有名，隨即通報執法部門。當局介入調查後，證實呢批古書正係紐約已故傳奇富豪惠特尼（John Hay Whitney）家族於40年前失竊嘅珍藏之一！據悉，惠特尼家族喺1982至1989年間盤點莊園收藏時，發現多達28本珍貴書籍不翼而飛，當中包括估值逾200萬美元（約1,566萬港元）、由詩人濟慈（John Keats）寫俾未婚妻嘅情書合訂本，價值連城！

賣書男洗脫嫌疑但仍有11本古籍下落不明

事件曝光後，全城關注究竟誰是幕後黑手。曼哈頓地檢署文物走私調查部門接手後，首先就向該名賣書男子問話。男子大呻無辜，聲稱古書係由已故祖父繼承，自己對其來源毫不知情。當局調查後，證實男子出生於竊案發生之後，已排除其嫌疑。不過，當年嘅竊案真相依然撲朔迷離，至今仍未鎖定任何疑犯，而且除咗搵返嘅17本書，仲有另外11本失竊古籍依然下落不明，當局強調會繼續追查，誓要將所有失物尋回。

2500萬珍本終物歸原主後人決定全數捐出

經過幾個月嘅調查同核實，曼哈頓地檢署終於喺4月20日舉行儀式，將呢17本總值近2,500萬港元嘅天價古書，正式交還俾惠特尼家族嘅後人。家族外孫博納文圖拉（Peter di Bonaventura）表示，家人對古書失而復得感到非常震驚同高興。為咗紀念呢件事，佢哋決定將呢批珍本拍賣，並會將所有收益全數捐作慈善用途，將呢份失而復得嘅喜悅分享俾更多有需要嘅人，結局相當圓滿。