漢堡包食得多，免費加大就真係未聽過！最近日本Burger King推出一個名為「All Heavy」嘅客製化選項，聲稱可以免費幫你加爆生菜、洋蔥、酸瓜、茄汁同蛋黃醬，一蚊都唔使加！呢啲「着數」嘢聽落好似好吸引，但係咪真係咁着數？有日本網民就決定親身實測，點知結果竟然係世紀大騙案，令佢大呻中伏！

日男實測640円華堡套餐驚見貨不對辦

事主為咗進行公平公正嘅比較，專登透過App點咗兩個完全一樣嘅華堡套餐，一個係普通版，另一個就揀咗「All Heavy」免費升級，兩個餐同樣盛惠640日圓（約港幣$31）。點知攞到外賣一打開，事主已經覺得唔對路！兩個漢堡無論係大細定厚度，望落都幾乎一模一樣，甚至個「All Heavy」版感覺仲細個少少。事主半信半疑下打開漢堡頂層塊包，發現普通版嘅生菜同洋蔥份量已經好足，但一睇「All Heavy」版，入面嘅餡料竟然同普通版冇分別，甚至感覺仲少咗啲，完全唔似有「加大」過！

上磅一秤更嬲豬驚揭相差足足14g

為咗查明真相，事主決定將兩個漢堡放上電子磅「公開處刑」！結果一磅之下，真相令人傻眼！普通版嘅華堡足足重281克，但聲稱「All Heavy」免費加大版，竟然只得267克，比普通版仲要輕咗足足14克！事主當堂嚇一跳，然後得啖笑，心諗唔通係店員貼錯貼紙？呢個結果令佢極度懷疑Burger King係咪當客係水魚，所謂「免費加大」只係宣傳伎倆，呃人落疊！

拆解餡料揭開真相原來呢樣嘢多咗

正當事主以為自己硬食「呃秤」漢堡之際，佢決定做埋最後一步，就係將兩個漢堡嘅所有餡料完全拆解，逐樣配料拎出嚟比較！呢個時候，案情竟然出現驚人反轉！雖然「All Heavy」版嘅生菜確實比較少，但洋蔥圈同酸瓜嘅數量就明顯比較多，單係酸瓜就由普通版嘅4條增加到6條！呢個發現證明店員並冇搞錯訂單，只係「All Heavy」嘅定義同大家想像中完全唔同。結論就係，如果你係酸瓜或洋蔥愛好者，呢個免費升級都仲可以一試；但如果想食得飽啲，似乎就唔好對「All Heavy」有太大期望喇！