返工最緊要係咩？就係準時出糧同埋唔好帶手尾返屋企啦！但最近內地有公司就遇到超離奇事件，公司幾十部公用手機突然集體失靈，全部無法通訊，員工檢查後嚇到個心離一離，發現手機入面最重要嘅一樣嘢竟然全部「不翼而飛」！最誇張係其中一間公司一次過唔見咗超過40張，究竟係咩玩法？

22歲男扮返工專偷SIM卡再用廢卡掉包拖延時間

警方接報後火速展開調查，發現受害公司多數係營運、培訓同直播類企業，因為業務需要而配置大量工作手機，結果成為不法份子嘅頭號目標。經追查後，警方鎖定一名22歲陳姓男子。原來佢專門透過網上應徵，入職後只係返一日工甚至更短時間就閃人，目的就係為咗攞到公司出入權限。之後佢會趁夜晚或者員工休息時間，靜靜雞潛返辦公室，用取卡工具偷走手機入面嘅SIM卡。為咗掩人耳目，佢仲會預先準備好「廢卡」塞返入去，令公司無法即時察覺，手法極之蠱惑！

失竊SIM卡極速流入詐騙集團警方揭露犯罪新手法

事件曝光後，最令人心寒嘅係呢批失竊SIM卡嘅去向。警方發現，呢啲SIM卡喺極短時間內已經被用嚟向多地密集式打電話，證實全部流入詐騙集團手中！警方指出，近年詐騙手法不斷變種，由於用境外電話號碼容易引起市民警覺，所以有詐騙集團就轉向用境內電話卡犯案，並透過呢種「短期入職」嘅方式大量收集SIM卡，以逃避追查。今次案件正正揭露咗呢種全新嘅犯罪模式，亦暴露咗唔少企業喺門禁同設備管理上存在嚴重漏洞。

警方閃電拉人籲公司加強審查堵塞管理漏洞

天網恢恢，疏而不漏！警方喺4月14日成功拘捕陳姓男子，其後更順藤摸瓜，拉埋佢嘅上游王姓疑犯，目前全案仍在擴大偵辦中。警方特別提醒各大公司，招聘時應該加強入職審查同背景核實，尤其要留意嗰啲返工短時間就極速離職嘅「一日員工」。同時，公司亦必須建立完善嘅手機同SIM卡管理制度，避免設備長時間無人看管。一旦發現SIM卡唔見咗，就要即刻停用同補辦，減低被不法份子利用嘅風險！