近年港人最愛「返鄉下」去日本旅行，不過日本嘅夏天出名又熱又濕，溫度更屢創新高，熱到令人叫苦連天！最近日本氣象廳就正式宣佈，因為天氣實在太熱，現有詞彙已經唔夠用，決定要為突破攝氏40度的極端高溫天氣創造一個全新嘅官方名詞，而呢個名詞嘅意思，竟然同經典動畫《新世紀福音戰士》主題曲有關，相當有衝擊力！

日本政府正式官宣新名詞 高溫衝破40度點樣形容

原來，日本氣象廳本身對炎熱天氣早有分級，氣溫達25度稱為「夏日」、30度為「真夏日」、35度則係「猛暑日」。但隨住全球暖化，近年日本夏天頻頻出現超過40度的極端高溫，令「猛暑日」都已經唔足以形容嗰種地獄級嘅酷熱。為此，當局決定新增一個名詞——「酷暑日」（kokushobi）。呢個「酷」字，正正就係《新世紀福音戰士》神曲《殘酷天使的行動綱領》入面嘅「酷」，意思即係「殘酷」，可想而知超過40度嘅天氣對人嚟講有幾咁殘酷！

逾20萬網民瘋狂票選 「酷暑日」壓倒性勝出拋離對手

呢個新名詞嘅誕生，原來係經過一輪網上民意調查。日本氣象廳上個月喺網站舉行投票，邀請民眾喺一系列候選詞中揀出心水。結果顯示，「酷暑日」獲得壓倒性支持，勁掃202,954票，票數係第二名「超猛暑日」（僅獲65,896票）嘅兩倍有多，可見日本民眾對「酷暑」呢個詞相當有共鳴。有氣象專家都力撐呢個選擇，認為佢簡單易明，又能準確傳達極端高溫嘅嚴重性。

氣象專家認證早有前科 網民憂未來或需更恐怖名詞

其實「酷暑日」呢個詞並非憑空出現，日本一個非政府天氣預測組織「日本天氣協會」早喺2022年已經開始使用，所以今次被官方「扶正」亦算係順理成章。不過事件亦引起網民熱議，唔少人擔心，既然已經有咗形容40度嘅「酷暑日」，如果未來氣溫再升到45度甚至更高，係咪又要創造一個更加恐怖嘅名詞？希望呢一日唔會咁快來臨啦！