天氣不似預期，行雷閃電真係唔講得笑！最近福建就有一名車主，諗住喺車入面拍低風雲變色嘅一刻，點知下一秒竟然天降巨雷，不偏不倚正正劈中自己架車！事主直擊驚險全程，畫面震撼，事後佢憶述返當時情況，仲係心有餘悸，大呻「成個人嚇傻咗」！究竟佢最後點樣？架車又有冇變廢鐵？

車內拍烏雲突遭雷劈直擊車頂事主嚇到魂飛魄散

事發喺日前，呢位車主見到出面烏雲密佈，就坐喺車入面用手機影低個天。點知拍下拍下，一道刺眼嘅閃電突然劃破長空，直接轟落佢架車度！事主憶述當時伴隨住一聲巨響，成架車都劇烈震動，佢當場嚇到呆咗，驚魂未定咁話：「聲音非常大，整個人嚇傻了」。強烈嘅電流甚至懷疑令車內嘅電子設備出現短暫異常，情況真係驚險過坐過山車！

驚魂未定唔敢落車足足呆坐40分鐘專家咁樣講

事件曝光後，唔少網民都替事主捏一把汗，大讚佢大命！事主就話自己當時真係嚇到唔敢郁，喺車入面足足呆坐咗成40分鐘先敢落車，可想而知個心理陰影面積有幾大。有專家就提醒，雖然汽車有一定防雷能力，但雷雨天都應該盡量避免喺空曠地方停車，最好揀室內停車場。如果真係不幸喺車內遇到雷擊，千祈唔好貿然落車，留喺車入面觀察情況先係最安全嘅做法。

大難不死奇蹟生還全靠中學都讀過嘅法拉第籠

咁點解事主可以喺雷劈之下奇蹟生還，毫髮無傷呢？佢事後都好慶幸，話全靠一個物理學原理救返佢一命，就係「法拉第籠」（Faraday Cage）效應！原來汽車嘅金屬外殼就好似一個保護罩，可以將閃電產生嘅強大電流，沿住車身表面傳到地面，令車廂內部嘅人唔會觸電。估唔到平時揸緊嘅車，喺關鍵時刻竟然變成救命神器！