去旅行親親大自然，見到野生動物總會特別興奮，但如果遇到識得「升級服務」嘅馬騮，你又會點應對？近日內地山區就上演咗令人O嘴嘅一幕，有遊客好心餵食一隻野生獼猴，點知隻馬騮食完嘢唔單止唔走，仲突然轉身翹起個靚股，示意遊客幫佢「拍兩下」，離奇舉動即時引爆網絡熱話！

獼猴討食後竟主動翹臀求拍打 嫌遊客手勢太輕要求加強版

根據網上瘋傳嘅影片所見，呢隻馬騮仔成功討食後，竟然自動波提供「售後服務」。佢非常熟練咁轉身翹起屁股，好似暗示遊客「識做啦」。當一位遊客嘗試輕輕力拍佢個pat pat時，隻馬騮即刻擰轉頭，面露不滿神色，彷彿鬧爆對方「冇食飯呀？」，之後更再次擺出相同姿勢，強烈要求一次「加強版」重擊，成個畫面既離奇又滑稽，真係令人啼笑皆非！

影片瘋傳網民笑到肚痛 質疑猴子已被人類帶壞兼識享受

事件曝光後，影片即時喺各大群組洗版，大批網民睇到笑爆肚，紛紛留言話：「呢隻馬騮也太識嘆世界了吧」、「肯定係俾人類帶壞咗」、「呢隻已經唔係普通獼猴，係有特殊體質」、「佢可能以為呢個係某種儀式感」。更有網民抵死地表示：「以後去山區係咪要先練定手勁」、「服務唔到位，隨時會俾佢投訴返轉頭！」

專家提醒切勿過度互動 隨時改變習性引發潛在危險

雖然場面爆笑，但亦有網民同專家提醒，隨意餵食野生動物以及同佢哋有過度互動，好可能會徹底改變獼猴嘅自然行為模式。呢啲行為唔單止會令佢哋對人類產生依賴，失去覓食本能，更有可能因為過份親近而引發抓傷、咬人等潛在危險。所以大家見到野生動物時，都係保持適當距離，遠觀就夠，千祈唔好亂咁餵食或接觸，以策安全。