同毛孩失散，絕對係每個主人嘅惡夢！美國有位痴心狗主，愛犬喺3年前慘被偷走，但佢從未放棄，更做出一個超狂舉動，就係為咗搵返隻狗而開咗間公司！每日燒錢推廣尋狗資訊，苦等超過1,000個日子，正當希望越嚟越渺茫之際，竟然喺今年3月迎嚟奇蹟轉機，但重逢過程原來驚險萬分，差一步就可能永遠錯過！

愛犬門口被偷走主人苦尋3年豪開公司尋狗

事件要由2022年7月講起，美國洛杉磯狗主Shelton嘅愛犬、一隻叫Baeya嘅波士頓㹴，當時只係喺屋企門廊休息，點知Shelton一轉身，Baeya就被人成隻偷走，從此人間蒸發！面對呢個晴天霹靂，Shelton冇選擇放棄，反而用咗一個極有毅力嘅方法。喺之後超過3年嘅時間，佢除咗瘋狂貼街招、聯絡各地動物機構，更索性成立一間公司同自家品牌，目的只有一個，就係持續推廣Baeya嘅相片同資訊，佢堅信：「我從來冇放棄過佢，只係每日等一個線索」。

朋友碌IG驚見尋回線索險被領養差一步錯過

皇天不負有心人，奇蹟終於喺今年3月底出現！當時Shelton嘅朋友碌緊社交平台，竟然喺動物救援組織「Wags & Walks」嘅post度，見到一隻啱啱由公立收容所救出嘅流浪狗，個樣同失蹤多年嘅Baeya幾乎一模一樣！經確認後，證實就係Baeya本人！最令人心驚膽顫嘅係，救援組織透露，原來喺佢哋出post嘅前一日，Baeya差啲就俾另一個家庭領養走，真係差一步，呢3年嘅堅持就可能白費，主人同愛犬就要永遠分離！

3年空白經歷成謎晶片重要性再惹起關注

雖然主人同愛犬最終奇蹟重逢，結局令人感動，但Baeya喺失蹤3年期間到底經歷過啲咩？點樣由賊人手上輾轉流落到收容所？呢一切至今仍然係一個謎。呢次事件曝光後，除咗令無數網民感動於主人嘅堅持，亦再次引起大眾關注，提醒所有寵物主人，為毛孩植入晶片同做好登記係幾咁重要，萬一不幸走失，都可以大大增加尋回嘅機會！