愛情同控制，有時真係一線之差！最近荷蘭一單恐怖情人事件引發全球關注，一名女子慘遭前男友長期虐待，對方竟將佢當成私人財產「標記」，全身近九成皮膚、超過250處被狠狠刻上痛苦印記，連塊面都冇得倖免，遭遇令人心痛！究竟呢種係愛，定係極致變態嘅佔有慾？
渣男買平價機狂紋250個名當財產
事件主角化名喬可（Joke），佢嘅前男友Hans竟網購一部平價刺青機，將佢當成私人畫布！喬可全身近九成皮膚，被殘忍紋上超過250個圖案，大部分都係前男友個名「Hans」同縮寫。更心寒嘅係，據協助組織透露，好多紋身係刻意刺喺胸部同臀部等私密位置，施虐者認為呢啲部位「曾被其他男人碰過」。喬可臉上幾乎被深色墨水覆蓋，臉頰同頸部都清晰可見前男友個名。雖然佢曾向當局報案，但前男友一句「佢同意」就令法律難以追究，簡直無法無天！
網民洗版鬧爆前男友行為令人髮指
事件曝光後，大批網民替事主不值，喺各大社交平台洗版式鬧爆前男友！唔少人睇到喬可滿臉紋身嘅相都表示極度心痛，「呢個唔係愛，係監禁！」、「點可以對一個人做啲咁恐怖嘅事？」、「直頭當人係物件，唔係人！」協助組織負責人安迪亦指出，任何有常識嘅人都知道，根本冇人會自願喺眼、鼻附近紋身，直斥前男友嘅講法荒謬。網民紛紛湧入募款頁面，希望用行動支持喬可走出陰霾。
獲籌27萬港元洗紋身盼年底重獲新生
幸好人間有愛，荷蘭組織「Spijt van Tattoo」（紋身後悔）為喬可發起眾籌，成功籌得超過3萬5千美元（約27萬港元），用作移除紋身及後續治療。從最新相片可見，喬可臉上大部分紋身已經移除，同過去嘅樣貌形成強烈對比。佢希望可以喺今年底前，將全身所有痛苦印記徹底清除。喬可更堅強鼓勵同路人：「曾經深受傷害嘅人也能重新站起來，如果我做得到，其他人都可以。」
