天氣潮濕，蚊蟲特別多，但諗都諗唔到寄生蟲竟然會喺人體內「築巢」！希臘一名58歲女子早前打噴嚏，竟然噴出一條長達2.5cm嘅蠕動活蟲，嚇到佢即刻衝去醫院求醫。醫生一照之下，發現佢鼻竇入面唔止一條，而係成竇「蟲蟲」，數量多達11件，畫面極度駭人！

戶外工作後鼻痛數周竟不以為意

事發喺去年9月，呢位58歲女事主喺戶外田野工作，當時附近有羊群，亦有大量蒼蠅喺佢塊面周圍飛嚟飛去，但佢完全冇放喺心上。點知一個禮拜後，佢就開始覺得鼻竇痛，仲持續幾個禮拜咳得好犀利，但依然死忍冇睇醫生。直到10月15日，佢打個噴嚏，竟然有條生勾勾嘅寄生蟲由個鼻噴出嚟，先知代誌大條！

手術驚揭鼻竇竟成11條蟲繁殖場

女事主嚇破膽，即刻去醫院求診，醫生檢查後發現佢鼻腔入面仲有活體幼蟲，即時安排手術。結果令人心寒，醫生最後由佢鼻竇夾出足足10條幼蟲同1個蟲蛹！經過專家化驗，證實呢啲係恐怖嘅「羊鼻蠅幼蟲」，專門寄生喺羊或山羊嘅鼻腔，成蟲後長度可達2.5cm，人類感染極為罕見，簡直係將鼻竇當成繁殖場！

專家揭罕見感染真相全因鼻腔結構異常

事件曝光後，醫學界都大感驚訝。專家指出，一般人體嘅鼻竇環境，無論溫度、濕度定免疫反應，都唔適合幼蟲生存。但原來呢位女事主本身患有嚴重「鼻中隔彎曲」，導致幼蟲入咗鼻之後排唔返出嚟，反而滯留喺鼻竇入面慢慢長大，甚至出現喺哺乳類體內「蛹化」呢種被認為「生物學上幾乎不可能」嘅現象。好彩嘅係，女事主手術後已經完全康復，算係不幸中之大幸。