去旅行試下當地特色「好西」本來係開心事，但隨時變驚魂體驗！日本人氣YouTuber夫妻檔「とったび」（Tottabi）早前就分享咗半年前喺非洲嘅恐怖經歷，事主近藤大真喺納米比亞挑戰食長頸鹿野味，點知食食下咬到硬物，一睇先知竟然係金屬碎片，事後更出現恐怖後遺症，搞到差啲鉛中毒，真係嚇餐死！

非洲挑戰野味竟食中獵槍子彈碎片

事發喺半年前，當時YouTuber夫婦去到非洲納米比亞一間餐廳，決定挑戰當地野味——長頸鹿肉。點知事主近藤大真食到一半，突然咬到一件超硬嘅物體，吐出嚟先發現係一塊金屬碎片！事後證實，呢塊碎片竟然係獵槍嘅子彈殘骸，而且佢好可能已經唔覺意吞咗一部分落肚。夫婦二人當堂嚇到個心離一離，即刻同餐廳理論，但店方處理手法勁hea，最後竟然只係以免單方式了事，令佢哋嬲到震，決定報警處理！

返日後四肢發麻驚揭血鉛超標25µg/dL

以為返到日本就無事？恐怖嘅事接踵而來！近藤大真返國後，身體開始出現唔妥，四肢無故發麻，於是即刻去醫院做詳細檢查。結果出爐真係嚇死人，血液測試報告顯示，佢體內嘅血鉛濃度竟然高達25µg/dL，遠遠超出正常水平！醫生即時警告，如果體內仲有鉛製嘅子彈碎片殘留，隨時有機會引發嚴重鉛中毒，後果不堪設想。

追蹤半年指數終回落惟仍高於正常標準

幸好，經過長達半年嘅定期追蹤檢查，近藤大真嘅情況總算有好轉。根據最新嘅檢測結果，佢嘅血鉛濃度已經由高峰期嘅25µg/dL，逐步回落到9µg/dL。雖然指數慢慢回復正常，但醫生都話呢個水平依然比正常標準略高，睇嚟今次「禍從口入」嘅驚險旅程，帶嚟嘅手尾仲要一段時間先可以完全解決，真係一次難忘又慘痛嘅教訓！