去日本旅行買手信，相信大家對明治（Meiji）旗下兩款國民級零食「蘑菇山」（きのこの山）同「竹筍里」（たけのこの里）都唔會陌生！呢兩款朱古力餅多年嚟各自擁有大批死忠粉絲，喺網上嘅「きのこたけのこ戦争」（蘑菇竹筍戰爭）從未停過。為咗平息呢場世紀紛爭，官方最近竟然出動AI分析人類面相，試圖搵出終極答案，點知一個驚人發現，竟然引發咗一場公關災難！

AI分析167萬人數據揭驚人發現

日本明治為咗深入研究呢場零食黨爭，竟然開發咗一個名為「きのたけ母」（Kinotake Mother）嘅專用AI系統。據報呢個AI學習咗超過167萬個偏好數據，再加埋數百名員工嘅面部資料，只要用鏡頭影低你個樣，就可以即刻分析你係「蘑菇黨」定「竹筍黨」。分析結果顯示，有52.4%嘅人係蘑菇黨，43.1%係竹筍黨，但最令人震驚嘅係，竟然有4.4%嘅人係「中立派」，兩款都鍾意！官方認為呢班「雙面人」無法從任何一款零食中獲得最大滿足感，於是決定為佢哋度身訂造一款全新產品。

新產品造型曝光網民鬧爆似黑暗料理

事件曝光後，大批網民都好好奇官方會點樣滿足呢4.4%嘅稀有食客。點知喺4月14日，官方正式推出名為「きたきたのこのこの里」（Kitakita no Konokono Yamasato）嘅合體版零食，實物竟然係將兩款餅乾壓碎，再混合成一條朱古力Bar！新造型一出即時引嚟網民洗版式圍插，粉絲們完全唔收貨，怒轟「AI永遠唔會超越人類」、「點解唔直接將兩包放入同一個袋？」、「冇咗個得意造型仲有咩意義？」、「還我可愛嘅蘑菇樣！」，更有人嘲諷「呢個係剝奪我哋身份認同嘅反烏托邦！」，場面完全失控。

官方稱滿足感最大化被嘲似另一神級零食

面對網民排山倒海嘅負評，明治官方解釋，開發呢款「暗黑合體版」係為咗令嗰4.4%嘅中立派消費者可以獲得「最大滿足感」。不過，呢個講法完全冇辦法說服兩派嘅忠實粉絲。更有眼利網民突破盲點，指出呢款所謂嘅「終極形態」零食，無論係外型定係成份描述，都同另一款日本神級零食「Black Thunder」（雷神朱古力）極度相似，質疑官方根本係「致敬」對手。呢款合體版零食目前只作限定發售，睇嚟呢場零食界嘅世紀大戰，遠遠未到終結嘅一日。