去日本奈良旅行，大家第一時間都會諗起去奈良公園餵鹿仔，但原來當地有款神秘名物，人氣高到每日都賣斷市，連本地人都未必買到！有日本記者多次專程拜訪都食白果，最近終於成功入手呢款傳說中嘅「奈良麵包」，點知切開一睇，內餡竟然係意想不到嘅「呢樣嘢」，令佢大感驚訝，究竟葫蘆裡賣緊咩藥？

記者N次撲空終買到每日秒速售罄名物

呢款名為「奈良麵包」嘅隱世美食，並唔係喺遊客區可以輕易搵到，而係要專程揸車去到距離奈良公園約40分鐘車程嘅公路休息站「Hari Terrace」先有得賣。據記者大呻，佢之前已經專登去過好幾次，但次次都因為太遲去到而摸門釘，店員都話一早賣晒！皇天不負有心人，佢最近再去挑戰，竟然好彩遇到店家啱啱出爐第二批麵包，先至有幸以280円（約14港元）嘅價錢買到呢個一位難求嘅夢幻逸品！麵包外表睇落平平無奇，似一個迷你版嘅法包，但拎上手就知外皮非常紮實。

切開驚見內餡竟是傳統漬物網民熱議

事件曝光後，大批網民都好好奇呢個麵包究竟有咩咁巴閉。當記者滿心期待，將麵包帶返屋企切開後，謎底終於揭曉！麵包入面嘅餡料，竟然唔係紅豆、吉士或者咖喱，而係奈良傳統特產「奈良漬」！所謂「奈良漬」，係用酒粕將青瓜、白瓜等蔬果醃製而成嘅漬物，味道鹹香帶有濃郁酒粕風味。而呢款麵包更加入蛋黃醬（沙律醬）調和，呢個新奇嘅配搭隨即引來網民熱議，唔少人都話估唔到麵包竟然可以同日式漬物crossover，紛紛表示「好想試下係咩味」、「鹹嘅麵包好似幾正」！

實測味道有驚喜鹹甜配搭竟是佐酒恩物

雖然麵包夾漬物嘅組合聽落有啲奇怪，但記者實測後竟然大讚有驚喜！佢表示，麵包外皮嘅香脆，加上奈良漬爽脆嘅口感，層次非常豐富。而蛋黃醬嘅 creamy 感覺，就巧妙地中和咗漬物嘅鹹味同酒粕嘅銳利感，令整體味道出奇地夾。記者形容呢款麵包風味獨特，充滿「大人嘅味道」，無論係當早餐、下午茶點心，甚至用嚟配啤酒清酒都一樣咁夾！各位準備去關西自駕遊嘅朋友，經過奈良不妨去碰下運氣，睇下買唔買到呢款限定名物做手信啦！