養貓嘅朋友都知，主子嘅開飯時間大過天，遲一分鐘都可能引發家庭慘劇！最近外國有位貓主就因為帶錯寵物出街食飯，唔記得準時返屋企餵貓，點知主子竟然上演一幕「千里尋奴記」，直踩餐廳當面對質，相關影片喺網上錄得超過250萬次觀看，場面既爆笑又心酸！

貓主帶狗外出撐枱腳獨留主子慘變世紀大騙案

事緣國外一位女飼主露西（Lucy）日前同伴侶帶埋愛犬出街食飯，撐枱腳撐到唔記得時間，完全錯過咗屋企主子賓士貓Mini嘅放飯時間。點知食到一半，露西竟然喺餐廳窗外見到一個熟悉身影！原來Mini發現全家出動竟然冇預自己，仲要搞到自己冇飯開，竟然嬲到自己出門口「尋仇」，一路追蹤到餐廳，隔住塊玻璃窗對住奴才瘋狂喵叫投訴，眼神充滿怨恨，完全當同場嘅狗狗冇到，隔住個mon都feel到佢嘅不滿，場面尷尬到極！

網民洗版鬧爆偏心貓主直言貓樣寫滿被背叛

事件曝光後，大批網民替主子Mini不值，紛紛湧入留言區洗版鬧爆貓主偏心！唔少貓奴都話身同感受：「全家都喺度，得隻貓喺屋企，好慘呀！」、「當隻貓發現連隻狗都有份去嗰陣，嗰種背叛感一定超強烈！」、「睇佢個樣就知啦，成塊面寫住『你哋夠膽就唔好返嚟』！」更有網民搞笑話貓咪其實係想講：「你哋即刻同我返屋企！」場面令人哭笑不得。

貓主揭主子曾失蹤24小時驚人黑歷史結局神反轉

面對主子當場斷正，露西嘅伴侶即刻衝出去安撫，將嬲到震嘅Mini抱起又攬又氹，先帶返座位平息主子嘅怒火。事後露西解釋，對於愛貓竟然識得自己搵上門都大感意外，但佢同時爆出一個驚人秘密，原來Mini過去曾經有離家出走失蹤足足24小時嘅「黑歷史」，令佢不禁懷疑：「唔通佢之前失蹤嗰陣，其實都係走咗嚟呢度？」，成件事即刻變得懸疑，唔通主子根本就係呢區地頭蟲？