抹茶控召集！香港人對抹茶嘅熱愛程度，相信都唔使多講，由蛋糕、雪糕到Latte，只要關抹茶事都總會引起搶購潮。但如果將抹茶著上腳，你又點睇？最近日本有間百年老店就忽發奇想，推出咗一款用「真．宇治抹茶」染色嘅拖鞋，索價竟然高達近$850港紙，消息一出即刻引起熱議，唔少人睇完都O晒嘴，究竟係咩玩法？

索價近$850港紙！京都宇治抹茶染色標榜3.1倍抗菌力

呢款引爆話題嘅「抹茶拖鞋」（Matcha Setta）其實係由日本奈良一間專門製作傳統鞋履嘅老店「Yamatokobo」推出。最爆嘅賣點，就係成對鞋真係用咗京都產嘅高級宇治抹茶嚟染色，呈現出超濃郁嘅抹茶綠色，像真度極高！官方仲強調，呢款拖鞋唔係得個樣，經第三方機構檢測後，證實茶染料有天然抗菌功效，抗菌評級高達3.1，遠超標準（2.0或以上），可以有效對抗金黃色葡萄球菌，著上腳唔單止夠潮，仲特別乾淨衛生！價錢方面就一啲都唔平民，男裝盛惠12,980円（約$845港元），女裝都要12,650円（約$823港元），真係當客係水魚？

網民錯重點憂惹蟻兼變綠腳！群組洗版：落雨會唔會溶？

事件曝光後，大批網民替荷包不值之餘，更多人係錯晒重點，瘋狂討論拖鞋嘅「副作用」！有網民就搞笑留言話：「用真抹茶？夏天著出街會唔會惹晒成竇蟻返屋企？」、「如果落雨對鞋會唔會溶？成腳變咗綠色點算？」、「著完成日對腳會唔會變咗抹茶味？」、「索價成$850，係咪著完會識飛？」，留言區瞬間變成創意大賽，引發群組洗版，大家都對呢個「食落肚」嘅概念變「著上腳」感到匪夷所思。

原來貴得有道理！百年工藝加持鞋帶用料係世界遺產

正當大家鬧爆定價太離地，就有識貨之人指出，呢對拖鞋其實貴得有道理！原來除咗用靚抹茶，鞋帶部分更用上一種叫「小千谷縮」嘅布料，呢種布料係新潟縣小千谷地區出產嘅頂級麻織品，更加被列入UNESCO非物質文化遺產，出名透氣唔黐肉，夏天著極之清爽。結合埋百年傳統工藝同埋有科學實證嘅抗菌功能，成件事即刻合理返晒！睇嚟呢對抹茶拖鞋唔係玩噱頭咁簡單，而係將傳統工藝同潮流結合嘅心血結晶，抹茶控想入手就要去佢哋官網搶購喇！