拍拖前想「驗貨」但又怕尷尬？最近美國一位戀愛教練就諗到一條「絕世好橋」，聲稱單憑觀察男士褲裝嘅輪廓，就可以估算出對方嘅「內在實力」，更將其分為A、B、D三級！呢條教學影片一出，即時喺網上瘋傳，至今已累積超過2200萬次觀看，引起軒然大波！唔少絲打都話要學嘢，但亦有巴打覺得被冒犯，究竟呢個「睇褲識人」大法係咩玩法？

美國戀愛教練教路睇褲分級估尺寸

事件主角係美國洛杉磯一位認證戀愛教練懷特（Anwar White），佢喺社交平台分享一套名為「睇輪廓」（catching print）嘅觀察法。佢解釋，無論對方著咩褲，只要留意拉鍊附近嘅隆起形態，就可以作出判斷。佢更將輪廓分為三級：A級係拉鍊中段有輕微隆起；B級係隆起較明顯同位置較低；而D級（刻意跳過C級）就係輪廓延伸得好長。懷特仲好有自信咁話，呢個方法係佢多年觀察嘅心血結晶，準確率高達9成，目的係想「賦予女性更多主動權」，喺發展親密關係前有多啲參考資訊，減少期望落差。

影片曝光後網民反應兩極掀起罵戰

影片曝光後，即時引爆網絡，大批網民喺討論區瘋狂洗版！唔少女性網民大讚教練「造福人群」，認為「學識咗可以避免中伏」、「拍拖前必修課」。不過，呢個教學就辣㷫咗唔少男士，大批男網民湧入留言區鬧爆，直斥呢種行為根本就係「公然物化男性身體」、「同班麻甩佬望女仔身材有咩分別？」。但亦有支持者反擊，話女性長期被外界用身材外貌評頭品足，而家只係「俾返啲顏色巴打睇」，體驗下同樣處境啫！

教練堅稱賦予女性主導權惹更大爭議

面對排山倒海嘅批評，教練懷特並無退縮，反而重申自己嘅初衷。佢強調，男性身體特徵喺關係初期難以得知，資訊唔對稱會影響女性嘅期望同體驗。佢堅信呢個方法可以降低不確定性，係為咗幫助女性，而唔係為咗物化男性。不過，呢番解釋似乎未能平息風波，反而令「物化」同「性別平等」嘅爭議愈演愈烈，睇嚟呢場男女網絡大戰仲有排拗！