去日本旅行最鍾意行超市尋寶，隨時有驚喜大發現！最近有記者喺日本一間連鎖超市，就發現咗一件「龐然巨物」，外型十足十新鮮出爐嘅巨型法國麵包，令人垂涎欲滴。但當佢行近一睇，先發現完全唔係嗰回事，真相嚇到佢個心都離一離！好奇心驅使下，佢決定買返屋企研究，點知一切開，入面嘅景象仲驚人，令佢忍唔住大呻：「究竟係咩嚟㗎！」
日本超市驚見巨型樹根蔬菜標價539円
事源係一位記者行經日本Ozeki超市時，遠睇以為麵包部有新品，一條超巨型法包橫放喺貨架上，非常搶眼。點知行到埋去，先發現呢條「法包」表面凹凸不平，質感極似樹皮，原來係一條巨無霸級嘅根莖類蔬菜——牛蒡！呢款名為「大浦牛蒡」嘅品種，體積係普通牛蒡嘅幾倍，拎上手份量十足。雖然標價盛惠539円（約35港元），比一般約100円嘅牛蒡貴幾倍，但記者為咗解開謎團，都決定買佢返屋企「開箱」！
切開驚見中空洞穴網民熱議似鐘乳石
相片被分享到網上後，隨即引發網民洗版式討論！當記者一刀切開呢條巨型牛蒡時，高潮就嚟喇——入面竟然唔係實心，而係一個不規則嘅中空洞穴，形態詭異，十足十地理堂見到嘅鐘乳石洞！呢個畫面嚇呆一眾網民，紛紛留言鬧爆：「個樣好得人驚，似千年樹妖！」、「切開仲恐怖，好似異形生物嘅巢穴」、「539円買舊樹根返去？當客係水魚咩！」不過亦有識食嘅網民指出，呢種大浦牛蒡係罕見食材，口感同普通牛蒡完全唔同，絕對值得一試。
記者實測變身家常料理味道竟有驚喜
面對呢條「異形」食材，記者並冇放棄，反而決定挑戰將佢變成美食。佢將牛蒡去皮切絲，再加入紅蘿蔔絲、味醂、醬油等，炒成一道經典家常菜「金平牛蒡」。經過一輪實測，記者發現大浦牛蒡嘅口感比普通牛蒡軟身，因為中空結構，反而更易吸收醬汁，味道極之濃郁入味！佢大讚味道有驚喜，口感獨特，雖然賣相嚇人，但絕對係物有所值嘅一次奇遇，證明睇嘢真係唔可以只睇表面！
