網上交友想「出Pool」，個人檔案（Profile）點樣寫絕對係一門高深學問！寫得太hea固然趕客，但原來寫得太詳細都可能出事。最近台灣就有個高薪工程師網上徵友，由學歷、收入到身高、病歷都鉅細無遺，點知竟然因為一句「媽媽說」，令佢嘅印象分瞬間跌到落谷底，引發網民激烈討論，唔少絲打都話呢三個字係「死罪」，寧願揀個矮嘅都唔要呢種！
高薪工程師條件全開身高163cm竟非致命傷
呢位台灣工程師喺交友帖文中，好誠實咁介紹自己背景，畢業於名牌大學，收入亦相當優渥，絕對係唔少人心目中嘅「潛力股」。不過佢亦坦白自己嘅弱點，包括身高只有163厘米，同埋有亞斯伯格症。但最令人O嘴嘅，係佢喺介紹文中竟然出現咗「媽媽說」呢三個字！有律師睇完都忍唔住出聲，直指雖然身高163cm係硬傷，但呢句「媽媽說」先係最致命嘅扣分位，一出口就已經輸咗九條街。
台女網民集體圍剿怒轟裙腳仔直接扣50分
事件曝光後，帖文隨即在網上瘋傳，大批女網民睇唔過眼，群起圍剿！唔少絲打都留言鬧爆：「裙腳仔真係不行，直接大扣分」、「媽媽說是硬傷，直接扣50分」、「已婚婦女31年經驗談：『媽媽說』是致命硬傷，仲有『姐姐說』都係！」留言區瞬間被「裙腳仔不了」嘅留言洗版。亦有網民錯重點，話見到身高163cm已經「直接滑走」，但更多人認為，比起身高，凡事都將阿媽掛喺嘴邊嘅「媽寶」行為先係戀愛市場上嘅最大禁忌。
裙腳仔都有分好壞孝順定無主見點樣分清楚
雖然「裙腳仔」三個字幾乎被判死刑，但亦有網民提出唔同睇法，認為唔應該一竹篙打一船人。有過來人分析，其實「同阿媽感情好」同「凡事依賴阿媽」係兩回事。關鍵在於個男仔係咪有自己主見，定係所有大小決定都要「向上請示」。如果只係孝順、體貼，但喺重要關頭能夠自己揸主意，就未必係壞事。所以各位絲打下次遇到呢類男仔，可能要花多少少時間，睇清楚佢係真孝順定係無主見嘅裙腳仔先好下定論！
