養寵物最驚喜嘅，莫過於見證佢哋各種得意又古怪嘅行為。最近內地就有一位女主人，分享咗一件發生喺佢同飼養足足20年嘅寵物龜身上嘅奇事。佢某日返屋企，一拎起隻鞋就覺得有啲唔對路，點知一睇入面，竟然發現一個驚人嘅畫面，令佢又驚又喜，忍唔住放上網問：「點解次次都係咁？」，事件瞬間引起全城熱話！
飼養20年愛龜竟在波鞋內瘋狂產卵
事主係嚟自山東青島嘅「子麇子麇」，佢表示自己飼養呢隻龜已經超過20年，感情深厚。點知呢隻「龜仙人」有個奇怪癖好，就係鍾意喺佢嘅鞋入面生蛋！事主憶述，呢種情況已經唔係第一次，計埋今次，已經發生咗4至5次。最近佢又再次發現愛鞋慘變「產房」，入面佈滿一粒粒白色嘅龜蛋。不過佢並無嚇親，反而覺得好驚喜又有趣，只係百思不得其解，點解愛龜對佢隻鞋情有獨鍾。
網民洗版熱議指龜龜報恩以氣味認人
事件曝光後，大批網民替事主開心之餘，亦紛紛化身「龜博士」解畫，喺討論區瘋狂洗版！唔少網民都認為，龜龜咁做係極度信任主人嘅表現，「因為鞋入面有你陣味，佢覺得最安全！」、「呢個係信任嘅證明，龜龜認定咗你！」。更有網民笑稱，龜龜係想用自己嘅方式「報恩」，將最珍貴嘅「寶寶」交俾最信賴嘅人，場面溫馨又搞笑。
龜蛋結局令人心酸原來全部無法孵化
正當大家以為可以見證一竇小生命誕生之際，事主就公佈咗一個令人稍感可惜嘅結局。原來呢隻龜一直都係單獨飼養，所以生出嚟嘅龜蛋全部都未經受精，根本無法孵化成小龜。至於點樣處理呢啲「空心蛋」，事主就話，平時會將佢哋埋入花盆當肥料，有時亦會俾返龜龜自己食咗佢，當係補充返營養，真係一啲都唔浪費！
