網購直播陷阱處處，隨時辛苦儲落嘅血汗錢就咁化為烏有！近日上海就有一位阿婆，喺直播間睇中一系列聲稱極具價值嘅玉石，前後豪擲近百萬，狂掃超過900件「珍品」，一心諗住可以靠轉售大賺一筆。點知當佢追問參展詳情時，竟被主播無情踢出直播間，阿婆心知不妙，驚覺自己墮入騙局，於是立即報警求助，事件嘅驚人內幕先得以曝光！

直播間吹噓養生包銷呃阿婆課金百萬買膠

據報，呢位楊阿婆本身係直播間嘅忠實觀眾，被主播以「保健養生」、「代客參展包銷」等甜言蜜語所迷惑，以為執到寶。喺主播嘅吹噓下，呢啲成本價僅$12蚊都唔使嘅仿製玉石，甚至係膠製品，搖身一變成為價值數百至上千元嘅「珍品」。阿婆前後課金高達88萬人民幣（約101萬港元），瘋狂掃入超過900件假玉石，諗住可以發個新年財。點知當佢發現參展承諾遲遲未兌現，喺直播間查詢時，騙徒為咗掩飾罪行，竟然即時將佢封鎖兼踢出群組，阿婆先如夢初醒，發現自己當咗水魚！

網民群起公審鬧爆騙徒手法卑劣無人性

事件曝光後，大批網民替阿婆不值，隨即喺各大討論區洗版，鬧爆騙徒手法極度無良！唔少人留言表示「呃老人家棺材本正X街！」、「$12蚊嘅膠賣幾千蚊，食水深到咁，良心去咗邊？」、「直播帶貨真係信唔過，全部都係劇本！」。更有網民提醒大家，騙徒最叻就係利用人性貪念同長者嘅資訊落差，大家一定要多啲關心屋企長輩，以免佢哋成為下一個受害者。

警方閃電拉人揭百萬騙局7人涉詐騙落網

楊阿婆報警後，當地警方迅速成立專案組展開調查。經鑑定後，證實阿婆花百萬巨款買入嘅全部都係假貨。警方順藤摸瓜，最終鎖定一個由鍾某、高某等人組成嘅7人詐騙集團，並將佢哋一網打盡。據悉，呢個集團經營多個直播間，以同樣手法犯案，截至案發時，涉案總金額已超過100萬人民幣（約115萬港元）。目前7名疑犯已因涉嫌詐騙罪被刑事拘留，案件仍在進一步調查中，總算還返阿婆一個公道！