又到計劃親子旅行嘅季節，一眾港爸港媽係咪已經諗到頭都大？最近一個「親子旅遊天花板」嘅網上投票，就引嚟超過二千名家長瘋狂討論，結果一個熱門地點以72%嘅驚人得票率，壓倒性姿態封王，拋離近年大熱嘅深圳、珠海！究竟邊個地方咁屈機，可以成為港爸港媽心目中嘅No. 1？即刻為你揭曉！

內地平靚正屈居亞軍深圳珠海豪華酒店成焦點

講到近年親子遊熱點，好多家長第一時間都會諗起大灣區。今次投票中，內地亦不負眾望奪得亞軍！有家長大讚內地親子遊勝在交通方便唔使搭飛機，可以「話走就走」，絕對係平、靚、正嘅快閃首選。特別係深圳同珠海嘅五星級酒店，唔少網民都話豪華到嚇親，房間「大過屋企個廳」，小朋友有足夠空間放電，大人又住得舒服，性價比極高！而排第三嘅泰國，就以親親大自然做賣點，可以抱老虎BB、餵長頸鹿，體驗夠晒特別，同樣深得家長歡心。

冠軍地點狂掃逾7成選票網民洗版式激讚呢個細節無得輸

投票結果曝光後，隨即引發群組洗版！講到冠軍，就係以72%超高得票率封神嘅日本！大批網民力撐日本係「親子遊天花板」，去過一次就「返唔到轉頭」。最多家長激讚嘅，就係日本對親子旅客嘅極致體貼！有港媽大呻，香港出街搵育嬰室難過登天，但喺日本幾乎「周圍都有」，而且乾淨企理，令湊B旅程輕鬆勁多。加上當地環境乾淨、景色優美，小朋友周圍跑都唔怕污糟，難怪成為家長心目中嘅不二之選。

港媽分享日本屈機體驗一蘭拉麵免費食Outlet都有遊樂場

唔少家長更分享喺日本嘅「屈機」體驗，力證日本點解贏晒！有港媽分享，連去食一蘭拉麵，小朋友竟然有專屬嘅免費迷你版，貼心到令人感動。另一位家長就大讚，就算去Outlet血拼都完全唔使擔心悶親小朋友，因為商場周圍都設有Playground，可以俾小朋友盡情放電，大人細路都咁開心！呢啲魔鬼細節位，完全擊中家長們嘅心，令日本嘅「親子遊天花板」地位無可撼動！