遊韓港女福音！南韓政府豪擲1600萬推「全民福利」 7月起公共場所免費拎？

各位絲打去韓國旅行，最怕就係Shopping行到一半「大姨媽」突然嚟探訪，周圍又搵唔到便利店，真係勁徬徨！不過以後大家可以放心啦，因為南韓政府最近宣佈咗一項超貼心嘅新政策，絕對係一眾女士嘅福音，以後去韓國玩就更加安心！

政府豪擲1600萬推全民福利打破舊有資格限制

南韓衛生棉價格向來被指「貴到離譜」，為咗實現「生理期正義」，南韓政府決定狠砸30億韓元（約1,600萬港元）推行「公共衛生棉Dream」試辦計劃！以往只有低收入青少年先有津貼，但由今年7月起，新政策將打破所有門檻，任何有需要嘅女性，都可以喺居民中心、保健所、圖書館同福利機構等公共場所，透過「免費自動販賣機」隨時拎到，完全唔使尷尬，對於遊客嚟講絕對係天大喜訊！

網民激讚德政但憂免費貨品質素官方派定心丸

事件曝光後，大批網民喺各大討論區洗版，激讚政府終於做實事，形容係「德政」、「女性福音」！不過亦有唔少人擔心「免費嘢冇好嘢」，質疑呢啲免費衛生棉，甚至市面上僅售100韓元（約$0.6港元）嘅超平價貨，安唔安全㗎？對此，南韓總統同食藥處都出嚟大派定心丸，強調所有衛生棉不論價錢，都必須通過同樣嚴格嘅安全標準，確保大家用得安心又放心。