去日本名古屋旅行又有新蒲點！最近日本網絡被一隻猩猩徹底洗版，短短幾日影片觀看次數已衝破1,800萬，主角唔係咩偶像明星，而係名古屋東山動植物園一隻13歲大猩猩！佢憑住一個不經意嘅動作，瞬間俘虜全日本網民嘅心，人氣甚至威脅到佢同樣係「型男」嘅爸爸，究竟佢有咩驚人魅力？

憂鬱眼神配神級接食動作俘虜萬千少女心

事件主角係13歲嘅雄性大猩猩「清正」（Kiyomasa），有網民喺X（前身Twitter）分享咗佢一段超有Feel嘅影片。片中見到清正一臉憂鬱咁挨住牆邊，渾身散發住一種放蕩不羈嘅男神氣場。最經典一幕，係飼育員掟出一個番茄，清正竟然不慌不忙，單手一伸就用極度優雅嘅姿態精準接實，再好似欣賞藝術品咁望一望先施施然放入口，成個過程流暢到好似拍緊廣告咁，令無數網民睇到心心眼，大讚佢簡直係「行走的荷爾蒙」！

網民洗版式激讚簡直係猩猩界木村拓哉

影片曝光後，大批網民替佢嘅魅力所折服，紛紛湧入留言區「示愛」，群組被徹底洗版！唔少人將佢封為「猩猩界的木村拓哉」，又話佢嗰種深邃又帶點叛逆嘅眼神，媲美荷里活巨星畢彼特（Brad Pitt），「呢個顏值係荷里活級數」、「接食物個動作根本係拍戲」、「連隻手都有戲，一秒戀愛了」。網民更笑稱：「呢家人到底食咩大？全家都靚仔到唔合理！」

猩二代成功逆襲粉絲敲碗求出個人寫真集

原來清正出身於「演藝世家」，佢爸爸「夏巴尼」（Shabani）早就憑住爆肌身型同型男舉止紅遍全球，當年仲破天荒出過個人寫真集！雖然清正細個嗰陣被網民話「未夠爸爸靚仔」，但估唔到大個仔之後成功逆襲，青出於藍！而家佢嘅人氣直逼爸爸，好多粉絲已經熱切期待園方可以快啲為清正推出個人周邊商品，甚至係全新寫真集，等大家可以好好收藏呢位「猩二代男神」嘅風采！