早餐想食得抵，又想對自己好啲，絕對唔係無可能！最近日本Krispy Kreme就突然宣佈一個超震撼嘅「佛心優惠」，每日朝早11點前只要買一杯飲品，就免費送你一件招牌產品，計落隨時慳返足足40%，CP值高到連便利店都輸！消息一出即刻引起全城關注，唔少港人準備去旅行都話要mark實，不過更多網民就錯重點，齊齊洗版大呻：「點解香港無份㗎！」

Krispy Kreme佛心優惠買飲品即送原味冬甩

今次Krispy Kreme Japan推出嘅優惠名為「Good Morning Original Glazed」，由4月8號起，喺日本全國分店（除極少數例外）每日朝早11點前，只要你買任何一款飲品，就可以免費換領一個價值216日圓（約11港元）嘅招牌「原味家鄉」冬甩！以一杯最平嘅345日圓（約18港元）咖啡計算，等於用唔使廿蚊就嘆到一杯即磨咖啡加一個新鮮出爐冬甩，慳近4成，真係抵到爛！最瘋狂嘅係，官方講明呢個唔係短期推廣，而係無限期嘅常規政策，簡直係益街坊！

網民錯重點狂呻香港無份齊齊洗版求引入

事件曝光後，大批網民替日本打工仔開心，紛紛表示「朝早有免費冬甩嘆，返工都精神啲」、「去日本旅行又多個早餐選擇」、「345円有啡有donut，平過香港食個包」。不過，更多香港網民就錯晒重點，將討論變成「許願大會」，齊齊喺各大旅遊同飲食群組洗版，葡萄大呻「點解永遠都係日本有」、「人哋嘅公司總唔會令我失望」、「跪求香港Krispy Kreme跟機引入啊」，睇嚟呢個優惠真係觸動到一眾港人最關心嘅切身利益！

官方解畫優惠原因原來同日本人習慣有關

點解Krispy Kreme會咁大手筆益街坊？原來背後有段故！官方解釋，呢個優惠舊年喺3間分店試行時反應超好，尤其受上班族歡迎。佢哋發現日本人普遍將冬甩當成下晝3點3嘅甜品，而唔係早餐，搞到朝早生意比較靜。所以公司就諗到呢招「免費贈品」策略，希望用一杯咖啡嘅價錢，送埋招牌冬甩，培養大家朝早食冬甩嘅習慣，順便帶旺早市人流，可以話係一盤精密計算過嘅生意經！