寵物小精靈（Pokémon）不經不覺已經面世30週年，絕對係唔少80、90後嘅集體回憶！為咗慶祝呢個大日子，官方聯乘活動一浪接一浪，誓要榨乾粉絲們嘅荷包。最近，日本東京君悅酒店（Grand Hyatt Tokyo）就推出咗一個超豪華嘅主題住宿體驗，有粉絲睇完成個package之後，不禁大呻：「真係豪華到癲！住一晚隨時貴過成個trip！」究竟有幾誇張？

豪華套房塞爆30隻比卡超分區任你玩

今次聯乘嘅重頭戲，就係呢間期間限定嘅「寵物小精靈30週年紀念冒險套房」！酒店竟然將足足120平方米（約1,292呎）嘅主席套房大改造，最震撼嘅係房內竟然有整整30隻比卡超毛公仔等緊你，寓意住Pokémon面世30年！酒店仲好有心思咁將套房劃分成唔同嘅「生態區」，客廳係奇異種子、地鼠嘅草屬性區；浴室就輪到車厘龜、傻鴨同背背龍等水屬性精靈坐鎮；而睡房就交俾小火龍同噴火龍等火屬性精靈，粉絲見到肯定會失心瘋！

事件曝光後網民洗版大讚超夢幻體驗

相關靚相一XX，即刻引爆全球粉絲喺各大社交平台瘋狂洗版！唔少網民都話呢個體驗「簡直係夢想成真」，大讚「成間房都係打卡位，電話無電都唔走！」、「好想去朝聖呀！」。除咗超豪華嘅房間佈置，最令粉絲心動嘅，其實係住客限定嘅30週年紀念精品！套房住客可以拎走成個禮品包，入面有護照套、手提袋、衫褲，甚至有初代御三家毛公仔同識講嘢嘅比卡超figure，難怪網民都話：「啲精品先係本體！」、「淨係為咗啲精品都抵返晒！」。

連早餐晚餐都係比卡超造型勁有心思

當你以為已經夠誇張，原來驚喜仲未完！呢個套房住宿Package係包埋房內享用嘅晚餐同早餐。晚餐主菜係超可愛嘅比卡超漢堡扒，而早餐就有塊又厚又鬆軟嘅比卡超Pancake，由朝到晚都有比卡超陪住你食飯，儀式感滿分！酒店亦有提供8間普通雙人房改裝而成嘅主題房，雖然無30隻比卡超咁震撼，但一樣有主題早餐食。呢個超限定住宿體驗由6月20日至8月26日期間提供，現已接受預訂，睇怕又會掀起一輪瘋搶潮！