春天去日本淨係識睇櫻花？少年你太年輕了！當大家仲回味緊稍縱即逝嘅櫻花季，其實喺壯麗嘅富士山腳下，已經悄悄鋪開咗一張超級夢幻嘅「粉紅地氈」！呢個期間限定嘅絕景，由足足50萬朵粉色花海組成，畫面震撼過睇演唱會，重點係東京出發唔使2個鐘就到，啱晒一眾錯過咗櫻花期、又想影靚相呃Like嘅港人去朝聖！

富士山下50萬朵芝櫻花海靚到超唔真實

呢片令人睇到嘩嘩聲嘅粉紅地氈，就係位於富士本栖湖渡假村嘅「富士芝櫻祭」！由4月11號去到5月24號，足足50萬株芝櫻（又稱針葉福祿考）會一齊盛放，形成一片無邊無際嘅粉紅、粉紫、純白交織花海，背景仲要係冠雪嘅富士山，隨手影都係Postcard級靚相！場內仲有「幸福之門」、「閃爍花滴鏡」等多個藝術裝置，俾你同閨密、伴侶盡情打卡，影足成個下晝都唔會厭！

網民洗版必食限定甜品同超萌打卡位

靚相曝光後，即刻引嚟旅遊群組瘋狂洗版，唔少網民都大讚「靚到癲！」、「好想即刻買機票飛過去！」。除咗花海，現場嘅限定美食先係戲肉！好似櫻花造型嘅「Sakura Churros」、超可愛富士山樣嘅「Fujiyama Honey Castella」，仲有外熱內冷嘅「炸麵包軟雪糕」，款款都係相機食先嘅呃Like神器！最估唔到嘅係，場內竟然有個「Peter Rabbit英式庭園」，喺日系風景入面忽然出現超萌嘅英倫風，呢個反差感絕對係必到打卡位！

入場費60蚊有找交通方法同旺季收費一覽

想去朝聖其實超方便！由新宿站搭特急列車「富士回遊」唔使2個鐘就到附近，再轉巴士就直達會場。如果想一程瞓到尾，仲可以預約由新宿、東京、澀谷等主要車站開出嘅直達巴士。至於大家最關心嘅入場費，成人只係1,000円（約HK$49），CP值極高！不過要留意，喺4月25號到5月10號嘅黃金檔期，票價會加到1,300円（約HK$64），想慳返幾十蚊嘅朋友記得上網預先買飛，仲有100円折扣！計劃去東京嘅朋友千祈唔好錯過喇！