返工壓力大到就嚟斷氣？相信唔少打工仔每日都被KPI追到貼地，做到身心俱疲。最近內地就有一位「00後」靚仔，因為頂唔順Sales行業嘅高壓生活，竟然毅然辭職，轉行投身一個大家估都估唔到嘅行業！佢自爆雖然人工唔高，但每日都過得超放鬆，究竟係咩「筍工」咁神奇？

00後難頂KPI地獄轉行殯儀

綜合內媒報導，呢位化名「周周」嘅25歲青年，本身喺蘇州做銷售，日日都要瘋狂打電話、跑數追業績，生活節奏快到令人窒息，搞到佢身心俱疲。頂唔順呢種「KPI地獄」嘅佢，舊年經親戚介紹，心一橫決定轉行，去到廣東清遠一個紀念園做禮儀兼物業人員。周周坦言，呢份工雖然無業績壓力，但同外界傳聞嘅「暴利」完全係兩回事，佢月薪只係得人民幣5000至6000蚊（約港幣$6900），工作日常就係巡邏、清理紙灰、打掃墓區，相當「清閒但瑣碎」。

網民熱議月薪僅6千蚊

事件曝光後，即刻引起網民熱議，唔少討論區都俾呢個話題洗版！好多網民都對殯儀業嘅人工大感驚訝：「吓？得$6000？我以為呢行好好搵，原來係都市傳說！」、「收費透明化咗，冇得亂開價啦」。不過更多人係對周周嘅選擇表示理解同羨慕：「完全明白，追數真係人都癲」、「用健康換錢最唔值，支持佢嘅決定」、「寧願搵少啲，都好過做到隻狗咁冇晒人生」、「呢啲先係生活，香港幾時先可以咁」。

事主嘆身心放鬆好過追數

對於外界普遍認為殯儀業好好賺，周周就澄清，因為風俗簡化同收費透明，加上墓園客流量唔大，所以收入只係中等水平，同以前做Sales嘅高壓狀態形成極大對比。雖然人工唔算高，但佢就感嘆：「呢份工作雖不賺大錢，但身心逐漸放鬆，自由度很高」。睇嚟對新一代嚟講，工作唔再只係為咗搵錢，心靈上嘅富足同健康，可能比銀行戶口嘅數字更加重要！