去旅行最怕遇上突發意外，尤其係喺機場等上機嘅最後關頭！近日港人熱門旅遊地點印尼就發生恐怖一幕，首都雅加達機場天花板竟然喺光天化日之下突然爆開，大量積水好似瀑布咁瘋狂湧落候機室，嚇到所有旅客雞飛狗走，場面極度混亂！有親歷其境嘅旅客大呻，成個過程持續足足5分鐘，真係「差啲以為要客死異鄉」！

雅加達機場T3驚變水舞間

事發喺4月6日下午約1點40分，地點係雅加達蘇卡諾—哈達國際機場嘅第三航廈（T3）。根據網上瘋傳嘅影片同目擊者描述，一開始只係天花板有少少滲水，點知幾秒後情況急轉直下，幾塊天花板材頂唔順壓力相繼塌落，夾雜住黃泥嘅積水瞬間傾瀉而下，候機室秒變「水舞間」！現場旅客見狀嚇到魂飛魄散，即刻拖住行李慌忙走避，尖叫聲四起，情況相當狼狽。有旅客事後猶有餘悸咁表示：「當時閘口有超多人，好彩我走得快！」

網民鬧爆豆腐渣工程質疑安全

事件影片曝光後，即刻喺各大旅遊同航空群組洗版，引起全球網民熱議！大批網民鬧爆機場工程係咪「豆腐渣」，「一個國際機場搞到咁，真係失禮死人！」、「連日暴雨就冧天花？咁個設計標準喺邊？」。唔少香港網民都睇到心驚驚，紛紛留言：「好彩唔係我班機，嚇到個心離一離」、「以後去印尼都有陰影」、「希望冇人受傷啦，真係好恐怖」。網民普遍替旅客捏一把汗，同時強烈質疑機場嘅維護同安全水平。

機場極速回應稱航班未受影響

面對排山倒海嘅批評，負責營運機場嘅國有企業「PT Angkasa Pura Indonesia」火速回應。機場通訊暨法務助理副主管Yudistiawan表示，事發後已即時派員清理現場，並強調事件中無人受傷，機場跑道、滑行道等設施亦冇受影響，航班服務好快就全面恢復正常。不過，雖然官方強調航班運作冇受阻，但有資料顯示，當日較早前已有數班航機因惡劣天氣需要改道，今次「瀑布」事件無疑令外界對機場應對突發狀況嘅能力打上一個巨大問號。