橫琴長隆必玩園區
一場嚟到橫琴長隆，當然要將精力留畀最精彩嘅樂園！長隆各大園區各具特色，絕對可以畀到你視覺同感官上嘅極大震撼（詳情及購票可參考長隆官方網站）：
👉 #假期策劃師 GenZ必睇！教你影海底夢幻相：立即觀看
👉 #假期策劃師 親子遊必睇！橫琴長隆親子友善設施分享： 立即觀看
1. 長隆飛船樂園：全球最大室內樂園 無懼日曬雨淋
外觀極具科幻感、猶如一架降落喺地球嘅巨大外星母艦，呢度就係最新落成嘅「長隆宇宙飛船」！作為全球最大嘅室內主題樂園，最大賣點就係全室內——無論外面係狂風暴雨定係酷熱警告，入到去都舒舒服服，絕對係帶住小朋友放電嘅「無敵神場」！
必睇亮點：阿凡達世界「珊瑚秘境」
- 夢幻海底打卡： 園內設有多個主題區域，你可以穿梭於猶如阿凡達世界嘅「珊瑚秘境」！必去擁有全球最大活體珊瑚缸嘅展區，色彩斑斕，仿如置身真實海底世界，打卡超靚！仲可以超近距離觀賞巨大又聰明嘅虎鯨，了解海洋生態。
- 一家大細啱玩機動遊戲： 樂園二樓嘅「宇宙樂園」有成 17 個機動遊戲，好似去咗室內嘉年華！小朋友可以玩超夢幻海洋主題旋轉木馬「水晶宮轉馬」、「海洋升降塔」同碰碰車！
- 必玩動感設施： 大人同追求刺激嘅年輕人，絕對不能錯過全球首創嘅「百慕大歷險」動感影院，坐上特製船艙經歷 5D 海上風暴，失重同離心力極度逼真！以及國內首個真實水下潛水艇「深海潛艇」。
【通關直奔攻略】呢兩大王牌設施平時極度搶手，強烈建議大家一入場就直衝去玩咗先！適逢復活節「錯峰出行」，唔使同內地旅客迫，平時要排成個鐘嘅人氣設施隨時可以「直行直入」包場咁玩，慳返超多時間玩盡樂園其他區域，爽度爆燈！
2. 橫琴長隆海洋王國：健力士鯨鯊館 視覺與刺激雙重享受
如果話宇宙飛船係室內王者，咁「海洋王國」就係長隆最經典嘅皇牌！園區規模極大，將稀有海洋生物展館同頂級機動遊戲完美結合。
震撼健力士紀錄
必去榮獲健力士世界紀錄嘅「鯨鯊館」！企喺超巨型嘅水族箱玻璃前，望住幾條身軀龐大嘅鯨鯊聯同過萬條珍稀魚類喺你頭頂優雅游過，嗰種深海視覺震撼真係令人歎為觀止。另外仲有超可愛嘅白鯨同企鵝館，小朋友睇到心都融埋，仲可以透過各種展館了解珍稀生物嘅生活習性，吸收豐富嘅海洋科普知識，從小培養愛護動物同大自然嘅愛心，絕對係極具教育意義嘅高質親子行程！
- 必睇煙花： 下午記得霸定位睇「海洋大巡遊」花車表演；夜晚壓軸上演嘅「海洋幻彩煙花秀」，完美結合無人機、水上飛人、璀璨煙花同立體投影，場面盛大，編輯強烈建議留到最後睇完先走！
- 必玩機動遊戲： 自認膽大嘅朋友，一定要挑戰「鸚鵡過山車」！接近 20 層樓高嘅落差，加上 360 度雙軌翻轉，尖叫聲響徹雲霄！
3. 長隆秀：國際金獎級馬戲 絕無冷場
玩完一日機動遊戲，夜晚想舒舒服服坐低睇場Mega Show？一定要睇匯聚全球頂尖馬戲演員嘅「長隆秀」！在接近85分鐘的演出可以一次過欣賞到從威尼斯篇章到非洲風情、從中國傳統文化到搖滾百老匯的多元文化精髓，以及同觀眾打成一片嘅搞笑小丑互動。長隆秀更在2024年榮獲第31屆全球主題娛樂協會（TEA）頒發的「傑出成就獎之最佳演藝獎項」，實力備受國際肯定。華麗嘅舞台佈景加上扣人心弦嘅配樂，保證由 3 歲到 80 歲都睇到目瞪口呆，拍爛手掌！
路線實測：港珠澳大橋直達橫琴長隆
揸車去長隆到底有幾方便？編輯實測由香港出發，經港珠澳大橋直達橫琴長隆，路線極度直接：
珠海公路口岸通關流程
- 過橋： 由香港口岸出發，駛上港珠澳大橋。沿途海景優美，大約 40 分鐘車程就會抵達珠海公路口岸。
- 到達口岸： 駛離收費站後進入珠海口岸區，按指示駛入「小客車查驗通道」。
- 落客查驗（「人車分流」）： 車輛行駛至「小客車下客區」，除了司機外，所有乘客必須下車。
- 乘客： 步行前往「隨車人員驗放廳」進行人臉識別及證件查驗。
- 司機： 繼續駕駛車輛經過車輛「一站式」邊檢及海關查驗。
- 會合： 司機完成查驗後，在「小客車上客區」接回乘客。
- 直奔長隆： 離開珠海口岸後，直接駛上「港珠澳大橋珠海連接線」，向「南屏/橫琴」方向進發。途經加林山隧道，喺橫琴出口直出，沿住橫琴大道一直駛，跟住巨大嘅「長隆度假區」路牌指示，輕輕鬆鬆就到達！
行車時間： 由珠海口岸駛至橫琴長隆，全程只需約 30 分鐘，全程皆為高速公路及寬闊大道，極度好揸。
慳家攻略：一招解鎖度假區「免費泊車」
去得自駕遊，泊車費往往係一筆令人頭痛嘅隱藏開支。長隆各大園區嘅標準泊車費為小型車每 30 分鐘 4 元人民幣，24 小時內最高收費為 80 元人民幣。不過只要入住長隆嘅酒店識玩，就可以全程免費泊車：
- 免費秘訣： 只要你預訂並入住長隆度假區內嘅酒店（包括橫琴灣酒店、馬戲酒店、企鵝酒店、飛船酒店、迎海公寓酒店），就可以享有專屬嘅免費泊車優惠！
- 簡單登記步驟： 抵達酒店後，前往前台、禮賓部或客務服務中心，出示你嘅房卡或入住確認號，並向職員提供你嘅車牌號碼進行授權登記。
- 玩盡優惠時效： 完成登記後，住客喺退房當天晚上 24:00 前，都可以喺度假區內盡享免費泊車！你可以盡情揸車穿梭各大酒店同樂園，慳錢、慳力又慳時間！
【抵玩套票推介】
3天2晚住宿（包2大1小無限暢玩飛船樂園+海洋王國+長隆秀），人均每晚只需 HK$373起 ！
附錄：「港車北上」事前準備 Checklist
如果你係第一次打算「港車北上」，出發前記得要搞妥以下手續，確保旅程萬無一失：
- 申請手續： 必須先透過香港運輸署的「港車北上」官方網站提交申請。流程包括免試換領內地駕駛證、購買「等效先認」汽車保險（或內地交強險），以及完成中國檢驗有限公司（中檢）嘅驗車程序。
- 預約通關： 獲批「電子牌證」後，提早喺網上預約指定日子出發（部份日子免預約，最新安排可參閱「指定日子預約系統」）
- 必備文件： 出發當日，請務必帶齊香港身份證、回鄉證、內地駕駛證、香港車輛登記文件（牌簿）正本/副本，以及保險證明文件。
- 過橋費： 港珠澳大橋單程收費為 150 元人民幣。收費站支援現金（人民幣）、支付寶、微信支付。如果車上有安裝內地 ETC 設備更可以直行自動扣費。
- 導航 App 準備： 返到內地，常用嘅 Google Maps 準確度會大減。強烈建議出發前預先下載並熟習使用「高德地圖」或「百度地圖」，路線規劃同快相提示都極度精準，係北上自駕嘅必備神器！
一家大細將所有行李塞晒入車尾箱，一踩油門直達世界級主題樂園，呢種旅行體驗真係試過一次就返唔到轉頭！下個長假期，一於親自揸車帶屋企人去橫琴長隆瘋狂玩番轉啦！
