古天樂被爆「唔畀人趷得」宣萱即場反駁
在「本尊Fact Check」環節中，主持區永權直接求證古天樂是否如傳聞所指「唔畀人趷得」，豈料古天樂即時大反應指著宣萱說「佢嗰日唔趷過我唔開心」。當區永權追問宣萱是否「得你一個可以對住鏡頭趷佢」時，古天樂更搶答澄清「佢唔對住鏡頭都係趷架喇」，暗示宣萱私底下更加肆無忌憚。面對二人一唱一和，宣萱大力抗議並反擊指區永權都會寸古天樂，古天樂聞言搞笑回應「我好記仇嘅，你死緊喇今次」。
林峯加入戰團圍攻宣萱爆笑場面
戰況愈演愈烈，林峯突然加入戰團，但並非為宣萱護航，反而火上加油說「我喺度諗緊邊一日你係冇趷佢嘅，又好似冇」、「我未見過有其他人趷佢」。被圍攻的宣萱只能強調「開工我冇趷佢嘅」，豈料古天樂依然不放過她，反問「你咁都夠膽講嘅？！」。區永權嘗試打圓場分析「你會唔會趷佢趷到趷咗都唔覺得趷緊佢呢？」，宣萱竟哈哈大笑承認「咁我真係唔知」，古天樂見狀加多兩錢肉緊謂「咪係咯！咁我都唔知吖嘛，我都慣咗喇嘛，你估我想架？！」
宣萱「反白眼」攻擊古天樂被評「搞屎棍」
除了把口不放過古天樂，宣萱連「雙眼」及「雙手」都對古天樂「零客氣」。當宣萱談及與郭羨妮再度聚首「仲啱傾過以前」時，古天樂因一句「即係以前唔啱傾」口多多搭嗲，即時被宣萱「反白眼」攻擊兼負評為「搞屎棍」。之後宣萱提到重遇歐瑞偉時感覺很強烈，並指很快便能投入與對方的感情戲，古天樂又再口多多問「即係你同陶總管有感情線，你意思係」，結果宣萱嬲到狂打古天樂，古天樂只能無奈回應「成日郁手郁腳」。
古天樂閘住宣萱「熊抱」慘食連環拳
最搞笑的一幕發生在宣萱應區永權要求向古天樂表達謝意時，熱情的她即作勢送上「熊抱」，古天樂見狀即閘住說「唔好郁手郁腳呀喂」、「唔好摸呀！」。最後連環慘食檸檬的宣萱竟出拳狂打古天樂，十分搞笑。古天樂在節目中更暗示已經被宣萱趷到「冇晒感覺」，而宣萱亦會在節目中大方分享成功「趷古天樂」的秘訣，相信會成為觀眾熱議話題。
網民熱議兩人互動笑爆嘴
節目播出後，網民紛紛留言大讚兩人的爆笑互動，有人留言「宣萱同古天樂真係老友鬼鬼，睇到都笑死」、「古天樂被宣萱玩到冇脾氣，太搞笑啦」。亦有網民表示「呢個先係真正嘅化學作用，兩個人咁熟先會咁樣互窒」，認為兩人的友誼令人羨慕。《一周星星》第四集將於本周日晚10點翡翠台播映，相信會成為收視熱點。
（圖片來源：TVB）
