80歲羅家英上山下水 孭起阿姐再玩鴛鴦浸浴
今晚播出的不丹篇最後一集，家英哥將花式示範「上山下水寵妻大法」，為畏高的阿姐安排直昇機Tour，直上4,000米高空俯瞰旅遊景點虎穴寺。現年80歲的家英哥更在落機時，緊張地親自孭起愛妻落地，場面超甜蜜！之後，他更帶阿姐到梁朝偉及劉嘉玲結婚的酒店，享受熱石浴大玩「鴛鴦浸浴」。浸浴期間家英哥鬼馬本色盡現，突然「大腳趷起」自豪大晒白滑小腿，更搞笑表示： 「係人都話我隻腿又直又長又靚」，又自爆閒時會幫阿姐做Facial，為退休後的「第二人生」鋪路。阿姐亦相當受落，在家英哥追討獎勵時，更輕輕送上兩巴「掌」大玩食字Gag，再甜爆放閃：「有你陪住我，我點解唔幸福呀？」，閃瞎眾人！
羅家英「唐僧」上身勸阻 阿姐Shopping癮大發結局反轉
除了上山下水，節目還直擊了兩公婆的Shopping實況。向來爽快的阿姐一見到色彩鮮艷的羊毛披肩即雙眼發光，準備大開買戒，但身旁的家英哥卻「唐僧」上身，不斷碎碎念試圖勸阻：「屋企好多架喇」。雖然阿姐一度乖乖聽話，轉身說「Bye bye」準備收手，但最終依然敵不過心頭好，買癮大發！家英哥見狀決定「眼不見為淨」，獨自走出店外，事後見到阿姐滿載而歸時，嚇到成個彈起，更對著鏡頭做出「錢錢飛走」的手勢，場面極之搞笑。家英哥事後更爆料，指自己最長試過等阿姐Shopping等足兩個鐘，可見阿姐購買力驚人。
阿姐扁嘴質問「對牛彈琴」 羅家英秒回：依家你審我？
在旅程的尾聲，阿姐與家英哥進行深度對話盡訴心中情。不過，阿姐的主持習慣似乎改不掉，突然一針見血地向家英哥發問：「你話你同我講嘢對牛彈琴，我唔夠關心你定咩？」直接重提舊事，令氣氛一度變得緊張。家英哥亦不甘示弱，直接反問：「依家你審我？」，火藥味甚濃！不過，咪睇開頭針鋒相對，據悉二人最後都坦誠說出心底話，阿姐更會史無前例地展現出猶如熱戀中少女的可愛狀態，想知道家英哥如何化解尷尬場面，就要密切留意今晚播出的節目！
