今次KLOOK請嚟「少女旅行日記」旅遊blogger LaLa同大家分享，一個女生出走其他國家點樣玩得開心？唔熟嘅朋友叫買手信又點樣婉拒？即刻睇睇。
KLOOK：「自己去？同朋友去？同男朋友去？」
LaLa：「我覺得同唔同人去都有唔同樂趣，例如同男朋友去會好sweet，同friends去一大班人一齊shopping同share嘢食咁就好開心。但係我都鍾意自己一個去旅行嘅，因為好自由，自己鍾意去邊就去邊，又可以嘗試一下自己照顧自己。」
KLOOK：「自己一個會去邊？」
LaLa：「如果擔心安全嘅話，可以去一啲近啲嘅地方，例如台灣、韓國、日本，啲人好nice，自己一個都冇咁驚。有咗幾次自己去旅行嘅經驗呢，就可以去遠啲，去歐洲都應該冇問題。」
KLOOK：「去旅行最驚險嘅事係乜呢？」
LaLa：「我試過喺歐洲嘅時候遇到有賊囉！好驚㗎真係。佢哋會一大班人趁你買緊車飛時，就會圍埋喺你身邊，扮晒問路呀咁樣。另外佢啲同黨會圍埋上嚟偷你嘅銀包。」
KLOOK：「旅行中收到工作e-mail會點？」
LaLa：「我會視乎嗰樣嘢有幾urgent。如果嗰樣嘢係緊急嘅，我都會覆嘅。但如果唔緊急呢，我就唔理㗎喇！哈哈！」
KLOOK：「朋友叫你買手信你會點？」
LaLa：「我會視乎嗰個人同我熟唔熟。如果嗰個人係熟嘅話，少少嘢我都會幫佢買嘅。如果嗰個人係唔熟呢，我會同佢講：『我坐廉航㗎！唔包行李㗎！幫唔到你買嘢喇！』」
