對於「購物慾」,每人都有唔同嘅方法去滿足。有人鍾意買玩具,有人鍾意買名牌,或者遊戲課金。我有一位朋友,佢有一種好奇特嘅方法去滿足自己嘅購物慾……就係買淘寶嘅無聊嘢!

好多人都會淘寶,但我朋友專門買啲正常人根本唔會有意慾買嘅嘢……

01 | 迷信系列

任何人都有宗教信仰嘅自由,但如果盲目信奉,就會變成迷信。可能商人捉到呢個商機,就推出一系列令人笑到噴飯嘅服務。

我呢位黐線嘅朋友,就試過淘寶【開運驅邪引力波】、【能量加持】、【續命術】呢堆服務。

朋友話,購買過程非常簡單,只需要付費填寫有咩願望,或者想用「引力波」攻擊某仇人,就可完成訂單。之後朋友等咗半個鐘,見冇任何反應,就聯絡買家。買家話已經收到訂單,並聲稱師傅正在發射「引力波」。

圖片來源:《逆緣》劇照

另外兩種服務亦一樣,師傅會幫你隔空完成,你只需要靜待家中,自我感覺良好就可以。不過最搞笑嘅係,嗰位賣家仲有一樣產品,叫【防引力波毛氈】,用嚟防止其他人用「引力波」攻擊自己。

於是,朋友就買咗張毛氈返嚟,再叫個師傅攻擊佢自己……結果,賣家就再冇回覆過佢。

圖片來源:淘寶

02 | 重口味系列

仲有個系列非常重口味,朋友向我多次發誓佢雖然有買,但絕對冇用過!淘寶有【女神洗澡水】、【女神屁】、【女神內衣】、【男人專用『有洞』絲襪】……

【女神洗澡水】買到返嚟係一瓶非常普通嘅番梘水,至於【女神屁】,係一個空瓶。而【男人絲襪】,係一個中間有多個洞嘅肉色絲襪。其中一樣非常有趣嘅係,【女神屁】仲有好多分類,有唔同嘅餐單,註明女神放屁之前食過乜嘢,真係隔住個mon都聞到臭味。

圖片來源:淘寶

03 | 不道德系列


呢一個系列連我朋友都唔敢買,除咗一般嘅貓狗寵物可以淘寶買到,仲有某啲地方嘅新娘可以買得到,仲保證五年內走佬會免費賠番另一個新娘,真係獨身漢福音。

另外,有啲比較不合乎道德嘅服務,例如有一個【非洲祝福】嘅服務,只需要用大約HK$150就會有一班非洲小朋友對住螢幕大叫你個名,再講幾句祝賀說話,最後喺螢幕前跳舞……聽聞呢班小朋友唔會得到任何酬金,只會有一啲糖果零食作為獎勵。

最令人不安嘅,就係淘寶可以買一堆超重口味影片,例如食昆蟲、生食青蛙、生食巴西龜,仲有一大堆虐待動物嘅影片。

圖片來源:淘寶

下一頁:去旅行時無法習慣嘅文化,美國食飯畀小費肉都赤埋

相關文章