貴賓室已經不再是貴賓的專利,有時我真係寧願周圍行下、食自己想食的,也不願去lounge。

不去貴賓室的原因,一來通常唔就腳,一上一落,又驚走機,休息十分鐘,又要去閘口,麻煩!如果在香港出發,通常校準時間,最多2小時前到機場,過海關之後,得一個鐘頭左右,享用貴賓室的時間真是不多。

二來好多貴賓室都充滿著食魚蛋粉嘅師奶,或者攞支水,來來往往嘅阿叔,真係仲多人過旺角,忙過麥當勞,現在還多了很多細路,每次我去完都覺得好吹脹!講真,入貴賓室為咗咩?為咗食?咖啡難飲,嘢食行貨,我寧願畀$15出去28號閘口食蛋撻王魚蛋好過;為咗一刻寧靜?Sorry ,只是充滿銀聯白金卡的家庭客,想靜靜哋寫個電郵,根本冇可能,不如去一個冇人的閘口,攤長雙腳慢慢上網好過。

我覺得在香港其實真的不需要去貴賓室,商店應有盡有,地方又大,基本上要消耗1小時,根本不難。除非delay ,或者需要洗澡,否則行下ZARA、去書店看看平時少見的國際雜誌,或瘋狂上網,都非常自在。當然,如果不是在香港出發,或者回程的時候,位處設備沒有那麼豐富、商店貧乏的機場,一個貴賓室的確是及時雨,有時還可以避開外面「難民級」的旅客,真是好用。

話雖如此,今個星期,終於在香港見識到一間好的貴賓室,原來堅有用,馬上恨自己:「根本係之前去嗰啲唔夠高級!」甚至覺得自己有點大鄉里。位於一號閘口附近的Plaza Premium First,上年年中翻新,新淨靚仔唔在講,服務也不錯,可預訂按摩服務,staff 會提醒你上機閘口距離。

Plaza Premium First

Plaza Premium First

不過我雙眼始終放在食物上,這方面,此lounge贏晒! A la carte menu  有幾好食的龍蝦意粉丶Beyond Meat 素漢堡丶Bellota Bellota 名牌靚火腿丶一個櫃嘅蔬菜沙律,當然也有魚蛋粉丶粥等港式食品,任食!(好聽啲講就係任食,不過羊毛出在羊身上,入一次3小時$800?。)臨走還送我保溫壺,裝咖啡上機飲!

Plaza Premium First 龍蝦意粉

Plaza Premium First

Plaza Premium First

如果貴賓室做到咁樣,我真係覺得自己似貴賓!

結論:唔係貴賓,攞住張AE卡入去貴賓室,諗住可以做貴賓嘅,其實可以慳番……但有機會加錢去真.貴賓室,可以諗諗!

Plaza Premium First

Plaza Premium First

相關文章