每個人嘅旅行方式都唔同,有人鍾意hea足一個上午,瞓飽先出發。亦有人鍾意天未光就起身,全身填滿晒所有行程。如果你鍾意一大班朋友去旅行,又夾到一班可以玩得好開心盡興嘅朋友,真係要好好珍惜。因為,如果同班旅遊風格唔太夾嘅朋友去旅行,唔單止唔開心,仲有可能會嘈交。

旅伴不停周街搵廁所

先講去旅行最常做嘅事,就係去廁所同影相,但如果一大班朋友去旅行,要等齊人去廁所就好花時間。

上次同行有個女仔經常性要去廁所,食飯時又唔去,全程十幾個人為咗佢一個女仔周街搵廁所。結果呢個女仔被勒令每次食飯或經過有廁所嘅地方都要去咗先,無謂浪費大家時間。

一大班朋友去旅行,要等齊人去廁所就好花時間。

攝影達人要求高 燈柱都影十幾張相

另外就係影相,如果同行有幾個攝影達人,對影相嘅要求高,行程就會花好多時間。

對於好多人嚟講只係一條燈柱,但攝影達人都會當藝術品咁影十幾張相。

同行有幾個攝影達人,對影相嘅要求高,行程就會花好多時間。

口講冇所謂 但一有唔滿意就黑面

不過最討厭嘅,就係一班成日將「冇所謂啦~你哋話事」掛喺口邊,但當有行程唔滿意就黑晒面嘅人。

嗰次嘅行程,最後解決辦法就係各自各分成幾組,去自己鍾意嘅地方,到晚餐先再約番一齊。

最慘當然係做搞手嗰個,約齊人已經係奇跡,幫手訂酒店機票,計劃好行程,最後仲要受氣。

夾到一班玩得埋嘅朋友要好好珍惜

其實,男人同女人去旅行已經有好大分別。

以去泰國為例,同女仔去一定會瘋狂購物行街,但上次同兩個男性朋友去泰國,瞓到下午先起身食午餐,上番酒店房打機,玩到夜晚再行陣街食飯按摩。

男人係永遠唔會明白,點解女仔要將每分鐘都塞滿行程,每晚令自己筋疲力竭咁返酒店呢?

所以,身邊有班夾到一齊去旅行又玩得開心嘅朋友,真係要好好珍惜。

伴侶就另計……因為就算你好唔鍾意行街,但女朋友好想行,作為男友嘅,都係要死死地氣跟住佢shopping……

下一頁:人生總會住過幾間中伏酒店!

相關文章