【日本廉航】強國人去日本走水貨都唔係咩新鮮事,去大阪心齋橋行一轉就已經知咩事。以為唔去啲旺區就可以避開佢哋?實在太天真喇!因為自從港珠澳大橋通咗之後,更加多強國人去香港轉機,如果搭廉航就一定遭殃,隨時半架機都係大陸人,喺關西機場check-in櫃枱已經感受到佢哋嘅強大!

撰文:杜遊珍|圖片:杜遊珍

日本廉航淪強國水貨客專用機

關西機場T2國際線從2017年開始啟用,Peach、春秋航空等廉航就搬到去規模細好多嘅T2,從此T2可以話係大陸水貨客集中地。每個都有一車二車行李,少則兩三個紙皮箱,多則六七個都有。人多、行李多,自然check-in都慢過人,由排隊到成功寄艙,足足等成粒鐘。至於點解搞咁耐,就要睇下我喺機場入面見證過發生咩事!

條隊長到以為排緊喜茶⋯⋯
個個都一車車紙皮箱。

阻住check-in

免稅品一般都要hand carry,預備過關畀海關check。雖然好多時大家都會側側膊放寄艙行李,海關都唔會特別check,但班水貨客幾大箱幾大箱咁買,又真係好難怪地勤人員要求佢哋開箱檢查嘅。不過班操普通話、帶有北方口音嘅水貨客就死都唔肯開箱,地勤人員搵埋機場海關幫手,搞咗成個鐘先肯行埋一邊拆箱。一拆之下,原來箱入面全部都係大陸好紅嘅「VH鮭魚卵精華」,試問幾個大男人又點會用得晒呢啲護膚品!

呢幾個男人足足霸住咗個櫃枱成個鐘!
就算海關人員嚟到都唔肯開箱,搞一輪先肯就範。

本身T2櫃枱已經少,又有好多人hand carry行李超重,要喺櫃枱前面即刻執喼,再加埋啲水貨客咁樣霸住個櫃枱,真係想快都難!

好多人hand carry都超重,去到櫃枱先肯執喼。

出現機場老鼠

喺排隊等check-in嘅時候,又有另一段小插曲,就係出現機場老鼠!有位操普通話嘅女士,佢架行李車足足有6件大行李,有啲用喼pack好都好啲,但有啲就只係用個白色大膠袋裝住,入面仲要係名牌手袋。然後突然之間佢大吵大鬧,嘈到成個T2都望住佢,仲喊晒口話:「你幹嘛偷我的包包,我要報警!」原來係另一位排喺前面、操普通話嘅女士攞咗佢個裝住名牌手袋嘅白色膠袋。

機場人員現身調停。

機場人員嚟到,疑似偷嘢嗰位就死口話自己一時攞錯,唔係偷嘢,咁當然咬佢唔入,最後當冇事發生。明明班機係飛香港,不過已經淪為大陸水貨客航線,至少一半都係大陸人,以後搭廉航真係少啲心血都唔得。

明明係飛返香港,但想搵個香港人乘客都難。

以後搭日本廉航,真係要預早兩個鐘去機場,因為唔知條隊又會發生啲咩事。