【瀕危世界遺產】有850年歷史嘅巴黎聖母院發生大火,震驚全球,好多朋友都覺得可惜。唔止入面大量珍貴歷史文物被燒毀,連最具代表性塔頂都倒塌。可能大家都以為一個咁著名景點理應屹立不倒,今次去唔到,下次下次下次大概可以,但其實好多地方未必有下次,甚至已經係「瀕危景點」!以下同大家盤點六個好大機會快將消失嘅景點,襯健在時盡早去,不要相信一切有下次!

撰文:C|圖片:Twitter、wikipedia

6大熱門 瀕危世界遺產

1|大堡礁

全場近3,000公里嘅大堡礁,幾乎橫跨咗成個澳洲昆士蘭,有超過2,900座珊瑚礁,一直以來都係世界知名嘅浮潛同潛水熱點,吸引大家慕名而來欣賞另一個海底異世界。

有去過大堡礁嘅朋友相信都會被震撼!

不過,因為全球暖化,唔止令海水溫度上升,更令珊瑚出現白化現象,有專家估計呢個海洋生態系統有機會喺2050年消失。

咁壯觀景色,一生人點都要睇一次!

2|馬丘比丘

位於秘魯嘅馬丘比丘,唔止係著名世界遺產,仲係新世界七大奇蹟之一,都係好多人心目中嘅Bucket list,既然去得南美點都要去打個卡。

要去「新世界七大奇蹟」打齊卡,又點少得馬丘比丘?

因為景點實在太出名,好多遊客不守規距,離開原本嘅路線,對古蹟做成好大破壞,更令馬丘比丘早前被迫要實施人流管制。同時,因為景點位於地震帶之上,即使遊客唔破壞佢,專家相信一場地震都分分鐘令佢消失!

依山而建嘅馬丘比丘,地勢險要,一場地震會唔會破壞到佢?

3|威尼斯

有「水都」之稱嘅威尼斯,係一個半海半陸地嘅城市,基督教與伊斯蘭教、中世紀與近世共融,擁有其他都市無法見到嘅獨特面貌,有著「亞得里亞海女王」嘅美稱。

「水都」威尼斯。

但喺2018年10月29日,因大浪同強風而令威尼斯大規模水浸。聖馬可廣場變成湖泊,歷史建築物・聖馬可大教堂嘅大理石地亦被水淹沒。雖然水浸唔算少見,但水位升至156cm,城鎮70%以上面積浸滿水,就實屬罕見。全球暖化導致水位上升,繼而令「地盤下沉」係其中一個原因。

如果狀況持續,威尼斯將有機會逐漸下沉,分分鐘會有「現代版亞特蘭蒂斯」嘅危機!

7成地方水浸嘅威尼斯,未來可能會成為「現代版亞特蘭蒂斯」?!

4|維也納歷史中心

最具象徵性嘅哥德式建築・聖史提芬大教堂,展露著奧地利、哈布斯堡皇朝嘅榮華嘅霍夫堡皇宮,直至現時都能充分展現著歐洲900年歷史嘅美麗街道。

「音樂之都」維也納都陷入人為環境危機!

有「音樂之都」嘅維也納亦被列入「危機遺產」之中!原因係有被高層建築物破壞景觀嘅危險,而且係整個「維也納歷史地區」。雖然興建高樓大廈仍只屬於計劃階段,但據說規劃地為維也納河流必經嘅,人民公園南方位置約6,500平方米嘅土地。

與歷史地區風格、景觀相違嘅現代高樓大廈,恐怕落成之後,先去造訪維也納,就會顯得冇咁宏偉氣派了。

高樓大廈嘅落成,好大機會影響維也納歷史地區嘅景觀!

5|玻利維亞

以「死前必去一次嘅絕景地」而聲名大噪嘅玻利維亞・烏尤尼鹽沼(天空之鏡),現正面臨嚴重嘅垃圾問題。每日要清理嘅垃圾達到約120噸,以一個25米標準泳池嚟換算嘅話,有整整兩個泳池!

玻利維亞嘅天空之鏡係唔少人心目中嘅人生bucket list之一。

由大量觀光客帶來嘅種種垃圾,不但嚴重破壞「天空之鏡」嘅自然景觀,而且大量垃圾入侵地下水道,導致倚靠地下水生活嘅原住民,以及家畜嘅健康受到嚴重影響。觀光巴士嘅泥土更造成污染,令道路地面變成啡色。

據說為咗挽救環境,會導入將塑膠垃圾分解變成石油嘅小型油化裝置,舉行保護自然環境相關嘅啟發活動。

大量垃圾不僅影響景觀,甚至危害當地居民、家畜的身體健康!

6|廣島縣嚴島神社

日本著名世界遺產,位於廣島縣・嚴島神社中嘅海上大鳥居,亦因眾多觀光客嘅一個舉動,而出現倒塌危機!

廣島縣嚴島神社嘅海上大鳥居,係日本引以為傲嘅世界文化遺產。

有傳聞話,成功將日本硬幣塞入鳥居兩邊嘅柱上,就會有好運降臨,於是為數不少嘅觀光客都仿效呢個做法,不停將硬幣塞進鳥居嘅大柱裡面。

位於海上嘅大鳥居,本來已被海水快速侵蝕緊,觀光客嘅「塞銀仔」行動更導致鳥居裂痕加深,令大鳥居浮現出倒塌危機。

大量觀光客趁潮退時走近鳥居,往鳥居嘅裂痕中塞入硬幣!令鳥居所受嘅破壞更加嚴重!

旅行雖然係一件開心事,但想留下美好回憶、做啲特別事,絕非破壞環境嘅理由,出遊謹記愛惜環境呀!

下一頁:大自然的魅力 | 11個必去的絕美世界自然遺產

下一頁:【世界遺產五漁村】意大利政府推新例 禁止遊客穿人字拖進入五漁村!

相關文章